کم عمر طالبہ کی بڑی کامیابی:40 سالہ پرانی ریاضی کی تھیوری غلط ثابت کر دی

کم عمر طالبہ کی بڑی کامیابی، 17 سالہ طالبہ نے 40 سالہ پرانی ریاضی کی تھیوری غلط ثابت کر دی۔
ہونہار طالبہ کو براہِ راست پی ایچ ڈی پروگرام میں داخلہ مل گیا۔ریاضی کی دنیا میں متعدد طلبہ کے کارناموں کی بےشمار مثالیں موجود ہیں، لیکن کسی کم عمر طالبہ کا بغیر ڈگری حاصل کیے اس شعبے میں بنیادی نظریہ بدل دینا انتہائی نایاب واقعہ ہے۔
امریکا سے تعلق رکھنے والی 17 سالہ ہوم سکول طالبہ ہنہ قائرو نے 40 سال پرانے ریاضیاتی مفروضے کو غلط ثابت کر کے ماہرین کو حیران کردیا۔یہ مفروضہ ہارمونک اینالیسز کے شعبے میں ایک پیچیدہ سوال ہے ،جو مڑی ہوئی سطحوں پر لہروں کے رویے سے متعلق ہے۔
گزشتہ 4 دہائیوں میں متعدد ماہرینِ ریاضی نے اسے ثابت کرنے کی کوشش کی، مگر کامیاب نہ ہو سکے۔ہونہار طالبہ نے صرف اس کا حل تلاش نہیں کیا، بلکہ ایک عملی مثال قائم کرکے یہ ثابت کیا ہے کہ یہ مفروضہ درست ہی نہیں۔ہنہ قائرو کا تعلیمی سفر بھی منفرد ہے، وہ نہ ہائی سکول سے فارغ التحصیل ہیں اور نہ ہی ان کے پاس کوئی انڈرگریجویٹ ڈگری ہے، اس کے باوجود انہیں براہِ راست یونیورسٹی آف میری لینڈ کے ریاضی کے پی ایچ ڈی پروگرام میں داخلہ دے دیا گیا ہے، یہ غیر معمولی کامیابی ریاضی کی دنیا میں ایک نئی مثال کے طور پر دیکھی جا رہی ہے۔