ہیومن چیٹ: سعودی عرب کا مقامی اے آئی ماڈل لانچ کرنے کا اعلان

ہیومن چیٹ، سعودی عرب نے مقامی اے آئی ماڈل لانچ کرنے کا اعلان کردیا۔
ہیومین کے چیف ایگزیکٹو طارق امین نے اعلان کیا ہے کہ پیر کے روز سعودی عرب میں مکمل طور پر تیار کردہ نیا مصنوعی ذہانت کا ماڈل ہیومن چیٹ باضابطہ طور پر لانچ کیا جائے گا ،جسے مملکت کی تکنیکی خودمختاری کی سمت ایک تاریخی سنگِ میل قرار دیا جا رہا ہے۔
سائنسی و ٹیکنالوجی منصوبے علّام کا آغاز سعودی ڈیٹا اینڈ اے آئی اتھارٹی (سدايا) کے تحت ڈاکٹر عبداللہ الغامدی کی قیادت میں کیا گیا ہے، یہ خطے کا پہلا ماڈل ہے، جس کا بنیادی ڈھانچہ، ماڈل اور ایپلی کیشن سب سعودی عرب میں ہی ڈیزائن، تیار اور ہوسٹ کیے گئے ہیں۔اس لیے ہیومین کی لانچنگ صرف ایک پروڈکٹ کی رونمائی نہیں، بلکہ مصنوعی ذہانت کے شعبے میں مکمل خودمختاری کی جانب سعودی عرب کا ایک جرات مندانہ اقدام ہے، جو مملکت کی بڑھتی ہوئی صلاحیت اور خطے میں اس کے کردار کو اجاگر کرتا ہے۔
سائنس اینڈ ٹیکنالوجی کے شعبے میں یہ پیشرفت سعودی عرب کی اس حکمتِ عملی کا حصہ ہے، جس کے ذریعے مقامی ٹیکنالوجی کو فروغ دینا، ڈیجیٹل ٹرانسفارمیشن کو تیز کرنا اور مستقبل کی عالمی معیشت میں قائدانہ کردار ادا کرنا شامل ہے۔