سپریم کورٹ نے نور مقدم قتل کیس میں مجرم ظاہر جعفر کی نظر ثانی درخواست کو مسترد کرتے ہوئے سزائے موت کو برقرار رکھنے کا حکم دے دیا ہے۔
جسٹس ہاشم کاکڑ کی سربراہی میں جسٹس صلاح الدین پنہور اور جسٹس اشتیاق ابراہیم پر مشتمل بینچ نے کیس کی سماعت مکمل کرنے کے بعد فیصلہ سنایا۔
سماعت کے دوران ملزم کے وکیل نے دلائل دیتے ہوئے کہا کہ وہ سب سے پہلے یہ تسلیم کرتے ہیں کہ نور مقدم کے ساتھ سنگین ظلم ہوا اور وہ متاثرہ خاندان سے معذرت خواہ ہیں۔
وکیل نے مؤقف اختیار کیا کہ ان کے دلائل کا بنیادی نکتہ وقوعہ کے وقت مجرم کی ذہنی حالت تھی۔ ان کے مطابق واردات اور ٹرائل کے دوران ملزم کی ذہنی کیفیت ٹھیک نہیں تھی، تاہم انہوں نے یہ مؤقف اختیار نہیں کیا کہ ان کے مؤکل نے قتل نہیں کیا۔
بعد ازاں عدالت نے فیصلہ سناتے ہوئے ظاہر جعفر کی نظر ثانی درخواست خارج کردی اور سزائے موت برقرار رکھنے کا حکم دے دیا۔
