قومی کرکٹرعالیہ ریاض اور علی یونس شادی کے بندھن میں بندھ گئے

لاہور:(پاکستان ٹوڈے) قومی ویمن کرکٹر عالیہ ریاض اور وقار یونس کے بھائی کمنٹیٹر علی یونس کا نکاح ہوگیا، تقریب میں قومی کرکٹرز نے بڑی تعداد میں شرکت کی۔

نکاح کی تقریب کا اہتمام نجی فارم ہاؤس پر کیا گیا تھا جہاں سابق کپتان وقاریونس نے مہمانوں کو خوش آمدید کہا،تقریب میں کپتان بابر اعظم، سابق سربراہ کرکٹ بورڈ رمیز راجہ، سابق کپتان مصباح الحق، محمد یوسف، وہاب ریاض، عبدالرزاق، کامران اکمل، امام الحق، مشتاق احمد اورعمران نذیر بھی شریک ہوئے۔

سوشل میڈیا پر وائرل ویڈیو میں دیکھا جاسکتا ہے کہ عالیہ ریاض نے زندگی کے اس یاد گار اور پُرمسرت موقع پر ہلکے بھورے رنگ کی میکسی کا انتخاب کیا۔دوسری جانب سابق کپتان وقار یونس کے چھوٹے بھائی اور کمنٹیٹر علی یونس سفید شلوار قمیض کے ساتھ اپنی دلہنیا سے میچنگ کرتے ہوئے ہلکے بھورے رنگ کے واسٹ کوٹ میں نظر آئے۔