نظام ِشمسی سے باہر زمین جیسی خصوصیات والا سیارہ دریافت

نظام ِشمسی سے باہر زمین جیسی خصوصیات والا سیارہ دریافت،سائنسدانوں نے کرۂ ارض سے باہر زندگی کی تلاش کے حوالے سے اہم سنگ ِ میل عبور کر لیا۔
سائنسدانوں نے دعویٰ کیا ہے کہ ایسا سیارہ دریافت کر لیا گیا ہے، جہاں زندگی گزاری جا سکتی ہے،کیونکہ دریافت ہونیوالے سیارے پر ناصرف زمین جیسی خصوصیات موجود ہیں،بلکہ وہاں پانی کے آثار بھی ملے ہیں۔
خلائی تحقیق کے امریکی ادارے ناسا نے دعویٰ کیا ہےکہ ہبل ٹیلی سکوپ نے نظامِ شمسی سے باہر ایک ایسے سیارے کا سراغ لگایا ہے، جس پر پانی بھی موجودہے ۔
ناسا کے مطابق GJ 9827d کا قطر زمین کے قطر سے دگنا ہے۔ یہ سب سے چھوٹا ایگزو پلانیٹ ہے، جس کی فضا میں پانی کے ذرات پائے گئے ہیں۔
ناسا کے ماہرین کا کہنا ہے کہ اس سیارے کا درجہ حرارت 400 سینٹی گریڈ ہے۔ میکس پلانک انسٹیٹیوٹ آف ایسرونومی کی ماہر لارا کریڈبرگ کا کہنا ہے کہ غیر معمولی درجہ حرارت کے باوجود یہ نیا سیارہ اپنی خصوصیات کی بنیاد پر توجہ کا مرکز بنا ہے۔
اس سیارے کے ذریعے سائنسدانوں کو زمین جیسے سیاروں سے نزدیک تر ہونے کا موقع ملا ہے اور زندگی کی تلاش کسی نتیجے تک پہنچ سکتی ہے۔
ماہرین کا کہنا ہے کہ اس سیارے کے دریافت ہونے سے متعلقہ شعبے کے محققین کی حوصلہ افزائی ہوئی ہے۔