بھارت کی پاکستان کو( فیٹف )گرے لسٹ میں شامل کرانے کی کوشش ناکام

پاکستان عالمی اعتماد حاصل کرنے میں کامیاب ،بھارت کی پاکستان کو( فیٹف )گرے لسٹ میں شامل کرانے کی کوشش ناکام ہوگئی۔
فنانشل ایکشن ٹاسک فورس (فیٹف) اجلاس میں بھی پاکستان کیخلاف بھارت کی کوششیں ناکام رہی۔ پاکستان عالمی اعتماد حاصل کرنے میں کامیاب ہوگیا۔
ذرائع کے مطابق بھارتی سفارتی وفد پاکستان کو دوبارہ گرے لسٹ میں شامل کروانے کی کوشش کرتا رہا لیکن فیٹٖف نے اس کے برعکس فیصلہ کیا۔ فیٹف نے پاکستان کو گرے لسٹ کے بجائے رپورٹنگ پر رکھنے کا فیصلہ کرلیا۔
اجلاس میں چین نے پاکستان کو ریلیف دینے کیلئے وکالت کی۔ ترکی اور جاپان نے بھی پاکستان کی حمایت کی ۔
بھارت ایف اے ٹی ایف کو پاکستان کیخلاف استعمال کرنے کی کوشش کرتا رہا۔ رکن ممالک نے بھارت کے منفی پروپیگنڈے کو مکمل طور پر نظرانداز کر دیا۔
واضح رہے کہ آپریشن بنیان مرصوص کے بعد بھارتی سفارتی وفود نے مختلف ممالک میں پاکستان کےخلاف زہر افشانی کی لیکن کسی بھی ملک نے بھارت کے سفارتی وفد کے بیانیے کو پذیرائی نہیں دی۔
دوسری جانب وفاقی وزیر خزانہ محمد اورنگزیب نے سینیٹ کی قائمہ کمیٹی خزانہ کے اجلاس میں خوشخبری سناتے ہوئے کہا کہ بھارت کو عالمی سطح پر ایک بار پھر ناکامی کا سامنا کرنا پڑاہے، عالمی بینک نے پاکستان میں ریکوڈک منصوبے کیلئے قرض کی منظوری دیدی ہے۔