پی ٹی اے نے نان رجسٹرڈ موبائل فونز خرید و فروخت کو جرم قرار دیدیا

پی ٹی اے نے نان رجسٹرڈ موبائل فونز خرید و فروخت کو جرم قرار دیدیا ۔ پاکستان ٹیلی کمیونیکیشن اتھارٹی (پی ٹی اے) نے تمام نان رجسٹرڈ موبائل ڈیوائسز کو جلد مقامی نیٹ ورکس سے بلاک کرنے کا اعلان بھی کیا ہے۔
پی ٹی اے کے مطابق نان رجسٹرڈ موبائل فونز کو ڈیوائس شناخت رجسٹریشن اور بلاکنگ سسٹم (DIRBS) کے ذریعے رجسٹر کرانا لازمی ہے، اس کے بغیر فون استعمال کرنا، خریدنا یا بیچنا جرم تصور ہوگا۔
اتھارٹی کے مطابق ایسے فونز اکثر سمگلنگ، مالی دھوکہ دہی اور سائبر جرائم میں استعمال ہوتے ہیں جن سے نہ صرف صارفین بلکہ ریاستی سلامتی کو بھی نقصان پہنچ سکتا ہے، اس لئے یہ اقدام پاکستان کے ٹیلی کام سیکٹر کے لیے ایک سنگ میل ہے۔
ماہرین کے مطابق دنیا کے کئی ممالک میں ایسے اقدامات سے موبائل سمگلنگ اور فراڈ میں نمایاں کمی آئی ہے، پاکستان میں بھی اس اقدام سے ناصرف سائبر سکیورٹی میں بہتری آئے گی، بلکہ معاشی اور سماجی سطح پر بھی مثبت اثرات مرتب ہوں گے۔
پی ٹی اے حکام نے صارفین کو ڈیوائس شناخت رجسٹریشن اور بلاکنگ سسٹم کے ذریعے اپنے فونز کا اسٹیٹس چیک کرنے اور بروقت رجسٹریشن مکمل کرنے کی ہدایت جاری کی ہے، نان رجسٹرڈ فونز استعمال کرنے پر صارفین کو ناصرف سروس کی معطلی ، بلکہ قانونی کارروائی کا بھی سامنا کرنا پڑے گا۔