نیٹ فلکس کی طرف سےٹی وی ویڈیو گیمز کھیلنے کی سہولت متعارف

امریکی سٹریمنگ پلیٹ فارم نیٹ فلکس کا صارفین کیلئے نیا فیچر متعارف، ٹی وی ویڈیو گیمز کھیلنے کی سہولت پیش کر دی۔
اس نئی سہولت کے تحت صارفین اپنے موبائل فون کو کنٹرولر کے طور پر استعمال کرتے ہوئے اب بڑی سکرین پر ویڈیو گیمز کھیل سکیں گے۔ابتدائی مرحلے میں نیٹ فلکس نے چند مقبول گیمز پیش کی ہیں، جن میں بوگل پارٹی، ٹیٹرس ٹائم واؤرپ، پکشنری گیم نائٹ اور لیگو پارٹی شامل ہیں۔ اب صارفین سمارٹ ٹی وی یا رُوکو جیسے سٹریمنگ ڈیوائسز کے ذریعے گیم کھیل سکیں گے،جبکہ موبائل کو کنٹرولر کے طور پر جوڑنے کیلئے کیو آر کوڈ سکین کرنا ہو گا۔
گیمنگ ڈویژن کے سربراہ ایلین ٹاسکن کے مطابق نیٹ فلکس طویل مدتی منصوبہ بندی اور کلاؤڈ سسٹم کو بہتر بنا کر اس شعبے میں اپنی پوزیشن مضبوط کر رہا ہے۔
کمپنی کا مقصد اپنی سٹریمنگ سروس کو محض فلموں اور ڈراموں تک محدود رکھنے کی بجائے ایک جامع تفریحی پلیٹ فارم میں تبدیل کرنا ہے۔