26 نومبر احتجاج کیس:علیمہ خان کی عدم پیشی پردوبارہ ناقابل ضمانت وارنٹ گرفتاری جاری

26 نومبر احتجاج کیس میں عدالت نے علیمہ  خان  کی  عدم  پیشی پردوبارہ ناقابل ضمانت وارنٹ گرفتاری جاری کردئیے۔
راولپنڈی انسداددہشتگردی کے جج امجد علی شاہ نے26نومبراحتجاج کیس کی سماعت کی۔پراسیکیوٹر سید ظہیر شاہ عدالت میں پیش ہوئے،جبکہ علیمہ خان اور ان کے وکلا عدالت پیش نہ ہوئے۔علیمہ خان کی عدم حاضری پر عدالت نے سخت برہمی کا اظہار کیا۔
پراسیکیوٹر سید ظہیر شاہ نے سماعت میں پانچ گواہ پیش کئے اور کہا کہ ملزمہ مسلسل عدالتی احکامات کی عدم تعمیل کر رہی ہیں، ملزمہ کے رویہ کے باوجود گواہ اور دیگر ملزمان مسلسل حاضر ہیں۔
اے ٹی سی نے علیمہ خان کی عدم پیشی پر ایک مرتبہ پھر ناقابل ضمانت وارنٹ گرفتاری جاری کر دیئے۔
عدالت نے نادرا، سٹیٹ بینک اور ڈی جی امیگریشن سے علیمہ خان کے شناختی کارڈ، پاسپورٹ بلاک اور بینک اکاؤنٹس منجمد کرنے کی رپورٹ طلب کرتے ہوئے مقدمے کی سماعت 30 اکتوبر تک ملتوی کر دی۔