گرین کلائمیٹ:گلیشیرز ٹو فارمز پروگرام کیلئے کروڑوں ڈالر کی منظوری

گلیشیرز ٹو فارمز پروگرام کیلئے کروڑوں ڈالر کی منظوری، ایشیائی ترقیاتی بینک (اے ڈی بی) کے گرین کلائمیٹ فنڈ نے گلیشیرز ٹو فارمز پروگرام کیلئے 25 کروڑ ڈالر کی منظوری دیدی۔
اے ڈی بی کے مطابق گرین کلائمیٹ فنڈ (جی سی ایف) دنیا کا سب سے بڑا ماحولیاتی فنڈ ہے، جس کے تحت 43 ویں بورڈ اجلاس میں حالیہ پروگرام کی منظوری دی گئی ہے، 2024ء میں جی سی ایف کی معاونت سے ہونے والی تحقیقات نے اس پروگرام کی سائنسی بنیاد فراہم کی تھی۔
اعلامیے کے مطابق یہ پروگرام ایشیائی ترقیاتی بینک کی قیادت میں پاکستان سمیت 9 ممالک میں شروع ہوگا، اس منصوبے کا مقصد گلیشیرز پر انحصار کرنیوالے خطوں میں پانی اور زراعت کے نظام کو مضبوط بنانا ہے۔اس منصوبے کے تحت اے ڈی بی آئندہ 10 برس میں منصوبوں پر 3.25 ارب ڈالر کی سرمایہ کاری کرے گا اور منصوبے کے تحت مؤثر آبپاشی، پانی ذخیرہ اور واٹر شیڈ مینجمنٹ کو فروغ دیا جائے گا۔گلیشیرز کے پگھلنے سے خشک سالی اور سیلاب جیسے خطرات میں اضافہ ہو رہا ہے اور اے ڈی بی کے اس پروگرام سے 1.3 کروڑ افراد، خصوصاً کسان اور پہاڑی علاقوں کی آبادی مستفید ہوگی۔
اعلامیے کے مطابق گلیشیرز سے نکلنے والے 4 بڑے دریائی حوض، نارین، پیانج، کُورا اور سوات، اس پروگرام کا حصہ ہوں گے، یہ منصوبہ موسمیاتی اور گلیشیرز تحقیق کو قومی ترقیاتی منصوبہ بندی میں شامل کرے گا، اس کے تحت خطرناک حالات سے نمٹنے کیلئے جدید وارننگ اور مانیٹرنگ نظام بھی قائم کیے جائیں گے۔