طلبا کیلئے اہم خبر:سکولوں میں سالانہ امتحانات کا حتمی شیڈول جاری

طلبا و طالبات کیلئے اہم خبر،سکولوں میں سالانہ امتحانات کا حتمی شیڈول جاری کردیاگیا۔
محکمہ تعلیم نےپنجاب میں کلاس اول سے کلاس ساتویں تک کے سالانہ امتحانات کا حتمی شیڈول جاری کر دیا۔
محکمہ تعلیم پنجاب نے سال 2026 کیلئے اپنی نئی منظور شدہ تعلیمی منصوبہ بندی کے تحت کلاس اول سے ساتویں کلاس تک کے امتحانات کا شیڈول جاری کیاہے۔ ان کلاسوں کے امتحانات 10 مارچ سے 22 مارچ تک منعقد ہوں گے اور نتائج 31 مارچ کو جاری کیے جائیں گے۔عہدیداروں نے آئندہ تعلیمی سال کیلئے ترمیم شدہ داخلہ پالیسی، نئے سکول کیلنڈر اور نصاب میں اپڈیٹس کو بھی منظور کر لیا۔
اپڈیٹ شدہ درسی کتابیں، جن میں کلاس 6 سے میٹرک تک کیلئے 29 متبادل شامل ہیں، دسمبر میں پرنٹ کیلئے بھیجی جائیں گی اور نیا تعلیمی سال یکم اپریل 2026 سے شروع ہو گا، جبکہ سرکاری سکولوں میں مفت درسی کتابوں کی تقسیم 5 اپریل سے شروع ہو گی۔
محکمہ تعلیم کےحکام نے خبردار کیا کہ پنجاب اب بھی شدید تعلیمی چیلنجز کا سامنا کر رہا ہے۔ 2025 کے سیشن کے دوران 2 کروڑ 80 لاکھ سے زائد بچے سکول سے باہر تھےاور توقع ہے کہ اگلے سال یہ تعداد 3 کروڑ سے تجاوز کر جائے گی۔
محکمہ تعلیم کا کہنا ہے کہ داخلوں میں کمی اور خاص طور پر لڑکیوں کے داخلوں میں کمی ایک بڑھتی ہوئی تشویش ہے، کیونکہ بہت سے نابالغ بچے سکول چھوڑ کر ریستورانوں، ورکشاپس اور دیگر غیر رسمی شعبوں میں کام کرنے لگتے ہیں۔