9مئی ڈیجیٹل دہشتگردی کیس میں عادل راجا، صابر شاکرسمیت دیگرکو 2،2مرتبہ عمرقیدکی سزا

اسلام آبادکی انسداد دہشتگردی کی عدالت نے9 مئی کوریاستی اداروں کےخلاف ڈیجیٹل دہشتگردی کیس میں عادل راجا، صابر شاکر، وجاہت سعید ، معید پیرزادہ، سید اکبرحسین ،شاہین صبہائی اورحیدر مہدی کو 2، 2 مرتبہ عمر قید کی سزاسنائی گئی۔
اسلام آبادکی انسداددہشت گردی عدالت کےجج طاہرعباس سپرا نے9مئی ڈیجیٹل دہشتگردی کیس کا محفوظ فیصلہ سنایا۔پراسکیوشن کی جانب سے راجانویدحسین کیانی عدالت میں پیش ہوئے جبکہ عدالت میں ملزمان کی جانب سےگلفام اشرف گورائیہ ایڈووکیٹ پیش ہوئے، پراسیکیوشن کی جانب سے کیس میں مجموعی طورپر24گواہان کوپیش کیاگیا۔
عدالت کی جانب سےگلفام گورائیہ ایڈووکیٹ کو ملزمان کا وکیل مقررکیا گیا تھا، انسداد دہشت گردی قوانین کے مطابق ملزمان کی عدم موجودگی میں ٹرائل کیا جاسکتا ہے۔
عدالت نے ڈیجیٹل دہشتگردی کے کیس میں عادل راجا، حیدر مہدی، وجاہت سعید، صابر شاکر اور معید پیرزادہ کو 2، 2 بار عمر قید کی سزائیں سنائیں۔
انسداد دہشتگردی عدالت نے ملزمان کو دیگر دفعات میں بھی مجموعی طور پر 35 سال قید اور 15 لاکھ روپے فی کس جرمانے کی سزائیں بھی سنائی۔
پراسیکوشن کی استدعا پر عدالت نے ملزمان کی غیر موجودگی میں ٹرائل مکمل کیا تھا اور کیس کا فیصلہ محفوظ کیا تھا۔
واضح رہے کہ تھانہ آبپارہ کے مقدمے میں صابر شاکر، معید پیرزادہ اور سید اکبرحسین کو عمرقید کی سزا سنائی گئی جبکہ شاہین صبہائی، حیدر مہدی اور وجاہت سعید کو تھانہ رمنا میں درج مقدمے میں سزا سنائی گئی۔