شاپنگ کے شوقین افراد کیلئے اب جلد اے آئی خریداری اور پیمنٹ کرے گی

شاپنگ کے شوقین افراد کیلئےخوشخبری، اب جلد اے آئی خریداری اور پیمنٹ کرے گی۔
متحدہ عرب امارات میں آن لائن خریداری کا نیا دور شروع ہونے جا رہا ہے۔ویزا اور ماسٹر کارڈ نے ایسے جدید نظام متعارف کرانے کا اعلان کر دیا، جو مصنوعی ذہانت کے ذریعے صارفین کی جانب سے خودکار طور پر محفوظ طریقے سے اور مقررہ حدود میں خریداری اور ادائیگی کریں گے۔یہ نیا رجحان ایجنٹک کامرس کہلاتا ہے، جس میں تصدیق شدہ اے آئی ایجنٹس صارف کی اجازت سے ان کی جگہ خریداری کرتے ہیں۔
ویزا کا انٹیلیجنٹ کامرس اور ماسٹر کارڈ کا ’ایجنٹ پے‘ اسی ٹیکنالوجی پر مبنی ہیں۔ صارف اپنے اے آئی اسسٹنٹ کو صرف ایک ہدایت دیتا ہے، جیسےد بئی کا ٹکٹ بک کرو اور سوئمنگ سوٹ تلاش کرو، تو یہ سسٹم چند سیکنڈز میں قیمتیں دیکھ کر ادائیگی بھی کر دیتا ہے۔
ماسٹر کارڈ نے یہ نظام مائیکروسافٹ کے ساتھ تیار کیا ہے، جبکہ ویزا نے مائیکروسافٹ، اوپن اے آئی اور سٹرائپ کے ساتھ ملکر اسے بہتر بنایا ہے۔ دونوں نظاموں میں ڈیجیٹل ٹوکنز اور محفوظ دستخط استعمال کیے جاتے ہیں ،تاکہ صارفین کی معلومات خفیہ رہیں اور غیر مجاز رسائی کو روکا جا سکے۔یو اے ای کے صارفین کیلئے یہ قدم آن لائن خریداری کو تیز، محفوظ اور خودکار بنا دے گا، جہاں اے آئی اسسٹنٹ صارفین کے اصولوں کے مطابق خود خریداری کرے گا۔