ایوبیہ : چیئرلفٹ پانچ سال سے بند ہونے کے معاملہ ایوان پہنچ گیا

سیاحت کے فروغ میں رکاوٹ ،خیبرپختونخوا  کے  سیاحتی مقام ایوبیہ میں پانچ سے بند چیئرلفٹ کا معاملہ ایوان میں پہنچ گیا۔
خیبرپختونخوا کے ضلع ایبٹ آباد میں واقع سیاحتی مقام ایوبیہ میں گزشتہ پانچ سال سے چیئر لفٹ کی مرمت نہ ہونے کا معاملہ خیبرپختونخوا اسمبلی میں پہنچ گیا۔
خیبرپختونخوا اسمبلی کے اجلاس کے دوران جے یو آئی کی خاتون رکن اسمبلی ایمن جلیل نے سیاحتی مقام ایوبیہ میں پانچ سال سے چیئر لفٹ نہ چلنے پر اسمبلی میں توجہ دلاؤ نوٹس جمع کروادیا۔
توجہ دلاؤنوٹس میں کہا گیا ہے کہ پانچ سال سے ایوبیہ میں مرمت کے نام پر چیئر لفٹ بند ہے، جس سے سیاحوں کی بڑی تعداد ایوبیہ تو آرہی ہے، لیکن چیئر لفٹ بند ہونے سے آنیوالے سیاحوں کی آمد میں کمی واقع ہوئی ہے۔
توجہ دلاؤنوٹس میں صوبائی حکومت سے مطالبہ کیا گیا ہےکہ مرمت کے نام پر پانچ سال سے بند چیئر لفٹ کو فوری کھولا جائے، تاکہ صوبے کو ریونیو کیساتھ سیاحت کو فروغ حاصل ہو۔ ایوبیہ کا خیبرپختونخوا کے اہم سیاحتی مقامات میں شمار ہوتا ہے، جہاں ہر سال ملک بھر سے بڑی تعداد میں سیاح تفریح کیلئے آتے ہیں، تاہم مشہور چیئر لفٹ کی بندش اور بنیادی سہولیات کی عدم دستیابی،یہاں سیاحت کے فروغ میں بڑی رکاوٹ ہے۔