قومی کرکٹ ٹیم کے سابق کپتان اور معروف فاسٹ بولر وسیم اکرم نے حج کے دوران اپنے تجربات اور پیش آنے والی مشکلات سے متعلق اظہارِ خیال کیا ہے۔
وسیم اکرم نے رواں برس سابق کپتان مصباح الحق اور ٹی وی میزبان فخر عالم کے ہمراہ حج کی سعادت حاصل کی، جس کی تصاویر اور ویڈیوز بھی سوشل میڈیا پر گردش کرتی رہیں۔
انسٹاگرام پر شیئر کی گئی ایک ویڈیو میں فخر عالم نے وسیم اکرم سے بطور ذیابیطس مریض حج کے دوران درپیش مسائل کے بارے میں سوال کیا، جس کے جواب میں انہوں نے بتایا کہ وہ اپنی انسولین ساتھ لے کر گئے تھے جو ایک مخصوص مدت تک مؤثر رہتی ہے۔
وسیم اکرم کا کہنا تھا کہ ان کے خیال میں حج مشکل نہیں، کیونکہ انسان عبادت کے جذبے کے ساتھ وہاں جاتا ہے، اور ہر مسلمان کو زندگی میں ایک بار حج کی سعادت حاصل کرنے کی کوشش کرنی چاہیے۔
انہوں نے مزید بتایا کہ حج کے دوران تصاویر بنوانے نے انہیں زیادہ تھکایا، کیونکہ مختلف مواقع پر لوگ ان کے ساتھ تصاویر لینے کے خواہشمند رہے۔
سابق کپتان نے حج کو ایک یادگار اور خوبصورت تجربہ قرار دیتے ہوئے کہا کہ انہوں نے اس موقع پر سب کے لیے دعائیں بھی کیں۔
