بانی پی ٹی آئی کے وکلا کا خان سےملاقات تک عدالتی کارروائی کا حصہ نہ بننے کا اعلان

نو مئی جی ایچ کیو حملہ کیس میں عمران خان کے وکلا نے بانی پی ٹی آئی سے ملاقات تک عدالتی کارروائی کا حصہ نہ بننے کا اعلان کردیا ۔
انسداد دہشتگردی عدالت راولپنڈی نے نو مئی جی ایچ کیو حملہ کیس کی سماعت 20 جنوری تک ملتوی کر دی ہے۔ وکیل صفائی نے دوران سماعت کہا کہ جب تک ہمیں بانی پی ٹی آئی سے ملاقات کی رسائی نہیں دی جاتی ہم عدالتی کارروائی کا حصہ نہیں بنیں گے۔
عدالت نے بانی پی ٹی آئی کے وڈیو لنک ٹرائل سے متعلق پنجاب حکومت کے نوٹیفکیشن کی کاپی وکلاء صفائی کو فراہم کر دی اور آج کی سماعت میں غیر حاضر تمام ملزمان کے ناقابل ضمانت وارنٹ گرفتاری جاری کرتے ہوئے مقدمہ کی سماعت آئندہ تاریخ تک ملتوی کر دی۔نو مئی جی ایچ کیو حملہ کیس کی سماعت کے موقع پر بانی پی ٹی آئی کے وکیل فیصل ملک جبکہ سپیشل پراسیکیوٹر ظہیر شاہ ٹیم کے ہمراہ اے ٹی سی جج امجد علی شاہ کی عدالت پیش ہوئے۔
وکلاء صفائی نے عدالت سے استدعا کی کہ جیل میں بانی پی ٹی آئی سے ملاقات کی اجازت دی جائے ہم نے ان سے کیسز کے متعلق ہدایات لینی ہیں۔اس پر پراسیکیوٹر ظہیر شاہ نے کہا کہ بانی پی ٹی آئی نو مئی جی ایچ کیو حملہ کیس میں ضمانت پر ہیں اور اس عدالت کی تحویل میں نہیں ہیں، بانی اب سزا یافتہ ہیں لہذا وکلاء صفائی متعلقہ فورم سے رجوع کریں۔سزا یافتہ مجرم جیل سپرنٹنڈنٹ کی تحویل میں ہے اور ملاقات کا اختیار بھی انہی کے پاس ہے۔