بیٹی سے مل کرپھرجوان ہوگئی ہوں،نشوبیگم

پاکستان شوبزانڈسٹری کی ماضی کی مشہور فلمی ہیروئن نشو بیگم نےکہاہےکہ بیٹی سے مل کر مجھے یوں لگا جیسے میں پھر سے جوان ہو گئی ہوں۔
پاکستان شوبزانڈسٹری کی معروف اداکارہ صاحبہ اوراُن کی والدہ نشوبیگم کے درمیان طویل ناراضگی کے بعداچانک ملاقات کےدوران جذباتی لمحات دیکھنے میں آئےجن کی ویڈیوسوشل میڈیاپروائرل ہورہی ہے۔ویڈیونے سوشل میڈیا صارفین کے دل جیت لیے۔ کچھ عرصے کی ناراضی اور دوری کے بعد یہ ملاقات دونوں کے لیے نہایت خاص ثابت ہوئی۔
اداکارہ صاحبہ اچانک اپنی والدہ کےگھرپہنچ گئیں جہاں پرنشوبیگم کچن میں اپنے ڈیجیٹل چینل کے لیے کھانا تیار کر رہی تھیں۔اس موقع پرنشوبیگم صاحبہ کودیکھ کرجذباتی ہوگئیں،پھردونوں نے ایک دوسرے کو گلے لگایا اور آنکھیں نم ہو گئیں۔
صاحبہ نے پیار سے پوچھا کہ کیا وہ انہیں یاد کرتی تھیں، جس پر نشو بیگم نے کہا کہ جب سے ان کے بچے کراچی منتقل ہوئے ہیں، وہ انہیں بے حد یاد کرتی ہیں۔
نشو بیگم نے اس موقع پر کہا آج اپنی بیٹی سے مل کر مجھے یوں لگا جیسے میں پھر سے جوان ہو گئی ہوں، جیسے میری عمر صرف بائیس برس ہو۔ بچوں کی محبت ماں کو جو طاقت اور توانائی دیتی ہے، اس کا کوئی نعم البدل نہیں۔
گفتگوکوجاری رکھتےہوئےانہوں نے کہا کہ لوگ پوچھتے ہیں کہ میں اب بھی خود کوکیوں اتنا جوان رکھتی ہوں، ویڈیوز کیوں بناتی ہوں، تو اس کی وجہ میرے بچے ہیں۔
نشوبیگم نےبتایاکہ بدقسمتی سے آج کے دور میں کچھ لوگ اپنے والدین کو وقت سے پہلے نظرانداز کر دیتے ہیں، ان سے ان کی جائیداد، گھر سب کچھ چھین لیتے ہیں اور آخر میں انہیں اولڈ ہاوس چھوڑ دیتے ہیں۔
خدا کا شکر ادا کرتے ہوئےنشوبیگم نےکہاکہ وہ اپنے آپ کو خوش قسمت سمجھتی ہیں کہ ان کے بچے ایسے نہیں۔
اس موقع پر صاحبہ نے بھی اپنی رائے کا اظہار کرتے ہوئے کہا ’لوگ تنقید تو ہر حال میں کریں گے، اس لیے بہتر ہے کہ انسان وہی کرے جو اس کا دل چاہے۔
واضح رہےکہ 2024ء میں صاحبہ کی پہلی بار اپنے اصل والد سے ملاقات کے بعد صاحبہ اور نشو بیگم کے درمیان تعلقات خراب ہونے کی خبریں سامنے آئی تھیں۔ نشو بیگم نے بھی ایک انٹرویو میں بتایا تھا کہ گزشتہ 8 ماہ سے ان کی بیٹی سے ملاقات نہیں ہوئی۔