لاہور ہائیکورٹ کے جج نے ڈکی بھائی کی درخواستِ ضمانت سے معذرت کر لی

جوا ایپ کیس میں لاہور ہائیکورٹ کے جج نے سعدالرحمان عرف (ڈکی بھائی) کی درخواستِ ضمانت سے معذرت کر لی۔
لاہورہائیکورٹ میں سعدالرحمان المعروف (ڈکی بھائی)نے جوا ایپ کی تشہیر کےکیس میں ضمانت کی درخواست دائرکی جس میں ملزم ڈکی بھائی کی جانب سے ایڈووکیٹ عمران چدھڑ جبکہ این سی سی آئی اے کے اہلکارعدالت میں پیش ہوئے۔
دوران سماعت این سی سی آئی اے کے اہلکار نے عدالت کے سامنے تفصیلی ریکارڈ پیش کیا جبکہ درخواست میں این سی سی آئی اے سمیت دیگر کو فریق بنایا گیا ہے۔
جسٹس فاروق حیدر نے جوا ایپ کی تشہیر کے مقدمے میں گرفتار یوٹیوبر سعدالرحمان عرف (ڈکی بھائی) کی ضمانت کیس کی سماعت سے معذرت کر تےہوئے کیس کسی دوسرے بنچ کے پاس لگانے کے لیے فائل چیف جسٹس کو ارسال کردی۔
ملزم سعد الرحمان عرف ڈکی بھائی نے جوئے کی ایپ کے پروموشن کے مقدمے میں ضمانت دائر کر رکھی ہے۔
درخواست میں موقف اختیار کیا گیا کہ درخواست گزار کو بیرون ملک جاتے ہوئے این سی سی آئی اے نے ایئرپورٹ سے گرفتار کیا، این سی سی آئی اے نے کبھی نوٹس بھجوا کر طلب نہیں کیا، ڈکی بھائی جسمانی ریمانڈ پر 10 روز تک این سی سی آئی اے کی تحویل میں رہے۔
واضح رہےکہ یوٹیوبر ڈکی بھائی کو 16 اگست کو آن لائن جُوئے اور منی لانڈرنگ کے الزامات کے تحت گرفتار کیا گیا تھا۔