پی ایس ایل میں انتظامی بہتری کیلئےملتان سلطانزکاپی سی بی کوخط

ملتان سلطانزکےمالک علی ترین نےپاکستان سپرلیگ(پی ایس ایل) میں انتظامی بہتری کیلئےپاکستان کرکٹ بورڈکےچیئرمین محسن نقوی کوخط لکھ دیا۔
چیئرمین پی سی بی محسن نقوی کولکھےگئےخط میں علی خان ترین نے مضبوط اور مزید شفاف پی ایس ایل کے لیے اصلاحات کی تجاویز دی ہیں۔
علی ترین نےخط میں لکھاکہ تجاویز کا مقصد شفافیت اور بہتر گورننس کے ذریعے پی ایس ایل کو مضبوط بنانا ہے۔علی خان ترین کی جانب سے لیگ کے لیے فرنچائز کی دیرینہ وابستگی کا اعادہ کیاگیا۔
خط میں ایڈہاک فیصلہ سازی اور محدود انتظامی تجربے کے بارے میں خدشات کا اظہار بھی کیاگیا۔
خط کےمتن میں کہاگیاکہ پی ایس ایل کمیٹیوں اور ورکنگ گروپس میں فرنچائز کی نمائندگی ہونی چاہیے۔ پی ایس ایل کے اہم رول کے لئے منعظم خدمات حاصل کرنا ضروری ہے۔میرٹ کی بنیاد پر بھرتی اور پیشہ ورانہ معیار کو بہتر بنانے کے لئے ہر رول کی وضاحت، امیدواروں کی جانچ اور انتخاب سے پہلے ان پٹ فراہم کرنے میں فرنچائزز کی شرکت ضروری ہونی چاہیے۔
علی ترین کی جانب سےلکھےگئےخط میں مزیدکہاگیاکہ پی ایس ایل میں اعلیٰ علاقائی ٹیلنٹ کو راغب کرنے کی صلاحیت ہے اور اسے صرف پی سی بی کے موجودہ یا سابق ملازمین پر انحصار نہیں کرنا چاہیے۔آپریشنز، مارکیٹنگ، مداحوں کی سرگرمیوں ، کھلاڑیوں کے معاملات اور مالی امور کےلئے ایک اہل ایگزیکٹیو ٹیم قیادت کرے۔طے شدہ تاریخوں پر ماہانہ میٹنگز ایجنڈے کے ساتھ پہلے سے مطلع کی جائیں ، منٹس ریکارڈ کیے جائیں اور شیئر کیے جائیں ۔یہ تجویز منعظم شراکت داری پر زور دیتی ہے اور عالمی سطح پر اس مقبول لیگ کی تعمیر کے مشترکہ مقصد کے تحت تمام اسٹیک ہولڈرز کی صف بندی پر زور دیتی ہے۔ایک کامیاب دہائی کے بعد پی ایس ایل کو اگلے درجے تک لے جانے کا وقت آگیا ہے۔