بلوچستان کے بیشتر علاقے خشک سالی اورشدید موسمیاتی چیلنجز کا شکار

بلوچستان شدید موسمیاتی چیلنجز کا شکار، معمول سے کم بارشوں نے صوبہ بلوچستان کے بیشتر اضلاع کو خشک سالی کی لپیٹ میں لے لیا۔
آبی انتظام کے سنگین مسائل صورتحال کو مزید گمبھیربنا رہے ہیں۔ایشین ڈویلپمنٹ بینک کے ڈویلپمنٹ ایشیا پلیٹ فارم کی حالیہ رپورٹ کے مطابق صوبے میں قابلِ کاشت زمین سکڑ کر صرف 7.2 فیصد رہ گئی ہے۔بلوچستان میں سیب، انگور، گندم، چاول سمیت 27 اجناس پیدا ہوتی تھیں۔
زرعی ماہرین کے مطابق پانی کی کمی کے باعث زرعی پیداوار مسلسل کم ہو رہی ہے۔بلوچستان میں کم بارشوں کے باعث زیر زمین پانی کی سطح ہر سال 3 سے 4 فٹ گر رہی ہے، جس سے خشک سالی بڑھ رہی ہے اور دیہی علاقوں کی 75 فیصد آبادی شدید متاثر ہو رہی ہے۔
زرعی ماہرین کا کہنا ہے کہ اگر بلوچستان میں آبی قلت کے حل کیلئے فوری اقدامات نہ کیے گئے تو قابلِ کاشت زمین مزید کم ہوجائے گی، جس سے زرعی اجناس کی شدید قلت پیدا ہوسکتی ہے اور لوگ نقل مکانی پر مجبور ہوں گے۔
ماہرین کے مطابق صوبے میں پانی کو محفوظ بنانے کیلئے آبی ذخائر میں اضافہ، وسائل کی بہتر مینجمنٹ اور مؤثر آبی انتظام ناگزیر ہو چکا ہے۔