پاکستان میٹرولوجیکل ڈیپارٹمنٹ (پی ایم ڈی) نے ملک کے مختلف علاقوں میں 2 سے 5 جون کے دوران آندھی، گرج چمک کے ساتھ بارش اور بعض مقامات پر ژالہ باری کی پیشگوئی کی ہے۔
محکمہ موسمیات کے مطابق یہ صورتحال مغربی ہواؤں کے ایک نئے سسٹم کے ملک میں داخل ہونے کے باعث پیدا ہوگی، جس کے تحت پنجاب، خیبرپختونخوا، آزاد کشمیر، گلگت بلتستان، بلوچستان اور بالائی سندھ کے مختلف علاقوں میں کہیں ہلکی اور کہیں تیز بارشیں متوقع ہیں۔
کچھ علاقوں میں شدید بارش، تیز ہواؤں اور ژالہ باری کے امکانات بھی ظاہر کیے گئے ہیں، جس سے نقصان کا خدشہ موجود ہے۔
حکام نے خبردار کیا ہے کہ اس دوران تیز ہواؤں، آسمانی بجلی اور ژالہ باری سے نقصان ہو سکتا ہے جبکہ شمالی علاقوں میں فلیش فلڈ، لینڈ سلائیڈنگ اور گلیشیائی جھیلوں کے پھٹنے کے خطرات بھی موجود ہیں۔
شہریوں اور مسافروں کو ہدایت کی گئی ہے کہ وہ اس دوران احتیاطی تدابیر اختیار کریں اور غیر ضروری سفر سے گریز کریں۔
