2025 میں پاکستانی کرکٹ اسٹارز کی شادیاں، کئی کھلاڑی رشتۂ ازدواج میں منسلک

سال 2025 پاکستانی کرکٹ کھلاڑیوں کے لیے شادیوں کے حوالے سے بہت خاص رہا،کئی قومی اور معروف کرکٹرز نے زندگی کے نئے باب کا آغاز کیا۔ شادی کرنے والے کھلاڑیوں میں ابرار احمد، حسن نواز، کامران غلام اور ویمن کرکٹر سدرہ نواز شامل ہیں۔
سب سے پہلے21 جون کو نوجوان بلے باز حسن نواز شادی کے بندھن میں بندھ گئے۔قومی کرکٹر کی شادی پنجاب کے ضلع لیہ میں ہوئی، جس میں ان کے قریبی دوست اور رشتہ دار شریک ہوئے ۔ حسن نواز نے بہت سادہ انداز میں اپنی شادی کی۔ اس کے بعد اکتوبر میں پاکستان کے مایہ ناز سپنر ابرار احمد کی کراچی میں شادی کی تقریبات منائیں گئیں جن کی ویڈیوز سوشل میڈیا پر بھی وائرل ہوئیں اور مداحوں نے ان کو مبارکباد دی۔ انکی شادی میں پاکستانی کرکٹرز اور چیئرمین کرکٹ بورڈ محسن نقوی نے خصوصی شرکت کی تھی۔
بلے باز کامران غلام کی شادی بھی اکتوبر کے مہینے میں پشاور میں ہوئی جس میں ان کے عزیز و اقارب اور ساتھی کھلاڑیوں نے شرکت کی۔ انکی شادی پر ابھرتے سٹار صاحبزادہ فرحان اور محمد رضوان نے خصوصی شرکت کی تھی اور انکی شادی کی وڈیوز بھی سوشل میڈیا پر بہت وائرل ہوئی تھی۔
پاکستان ویمنز کرکٹ ٹیم کی وکٹ کیپر بیٹر سدرہ نواز 23 دسمبر 2025 کو پیا گھر سدھار گئی۔ انہوں نے لاہور میں کاروباری شخصیت غیاث خان سے شادی کی اور شادی تقریبات پر انکی ساتھی کھلاڑیوں نے بھی شرکت کی۔