روس میں تعینات پاکستانی سفیر فیصل نیاز ترمذی نے کہا ہے کہ خطے کی صورتحال اور آبنائے ہرمز کی ممکنہ بندش کے پیش نظر پاکستان نے روس سے تیل درآمد کرنے کا منصوبہ تیار کر لیا ہے۔
روسی خبر رساں ایجنسی کے ساتھ گفتگو میں انہوں نے کہا کہ عالمی سپلائی چین میں رکاوٹوں کے باعث پاکستان متبادل اور محفوظ تجارتی راستوں پر توجہ دے رہا ہے، جبکہ روسی تیل کی خریداری بھی اسی حکمتِ عملی کا حصہ ہے۔
فیصل نیاز ترمذی کے مطابق پاکستان مستقبل میں روس سے تیل درآمد بڑھانے پر غور کر رہا ہے تاکہ توانائی ضروریات کو بہتر انداز میں پورا کیا جا سکے۔
تاہم پاکستان میں وزارتِ توانائی یا متعلقہ حکام کی جانب سے اس منصوبے کی فوری طور پر باضابطہ تصدیق یا تردید سامنے نہیں آئی۔
رپورٹس کے مطابق روسی تیل کی برآمدات میں مسلسل اضافہ دیکھنے میں آ رہا ہے، جبکہ اپریل کے دوران روسی تیل کی برآمدات میں گزشتہ ماہ کے مقابلے میں 4 فیصد اضافہ ریکارڈ کیا گیا۔
