محکمہ سیاحت پنجاب کا دسویں تھل ڈیزرٹ ریلی 2025 کے انعقاد کا اعلان

محکمہ سیاحت پنجاب نے دسویں تھل ڈیزرٹ ریلی 2025 کے انعقاد کا باقاعدہ اعلان کر دیا۔
اس حوالے سے لاہور میوزیم کے آڈیٹوریم میں تھل ریلی کی پروموشنل لانچ کی تقریب منعقد ہوئی، جس میں سیکرٹری سیاحت، آثارِ قدیمہ و عجائب گھر پنجاب ڈاکٹر احسان بھٹہ اور مینجنگ ڈائریکٹر ٹی ڈی سی پی عاصم رضا نے شرکت کی۔
اس موقع پر ڈاکٹر احسان بھٹہ کا کہنا تھا کہ تھل ڈیزرٹ ریلی 2025 کاایونٹ 6 سے 9 نومبر تک لیہ، کوٹ ادو اور مظفرگڑھ میں ہوگا۔ان کے مطابق یہ محض ایک موٹر سپورٹس ایونٹ نہیں، بلکہ جنوبی پنجاب کی ثقافتی عظمت، صوفی ورثے، لوک موسیقی، دستکاری اور ریگستانی طرزِ حیات کو اجاگر کرنے کا ایک جامع ثقافتی جشن ہو گا۔
سیکرٹری سیاحت نے کہا کہ تھل ریلی جیسے ایونٹس جنوبی پنجاب کے خطے میں معاشی و سماجی سرگرمیوں کو فروغ دیتے ہیں۔ ان سے ناصرف مقامی فنکاروں اور ہنرمندوں کو مواقع ملتے ہیں، بلکہ پاکستان کا مثبت اور پرامن چہرہ دنیا کے سامنے آتا ہے۔
منیجنگ ڈائریکٹر ٹی ڈی سی پی عاصم رضا نے بتایا کہ دسویں تھل ڈیزرٹ ریلی کا ٹریک تقریباً 200 کلومیٹر طویل ہوگا اور اس میں ملک بھر سے سو کے قریب ڈرائیورز حصہ لیں گے۔ریلی کے ساتھ لوک موسیقی کی محفلیں، اونٹ و گھوڑوں کے شوز، ٹینٹ پیگنگ، دستکاری بازار اور ثقافتی میلوں کا اہتمام کیا جائے گا۔اس طرح کے ایونٹس ناصرف پنجاب کے سیاحتی حسن کو نمایاں کرتے ہیں بلکہ تھل جیسے علاقوں کی معیشت پر بھی مثبت اثر ڈالتے ہیں، جہاں ریلی کے بعد کئی ماہ تک آمدنی اور سرگرمیوں میں اضافہ ہوتا ہے۔
تقریب کے دوران ٹی ڈی سی پی، ڈسکور پاکستان اور پاک وہیلز کے درمیان مفاہمتی یادداشت (ایم او یو) پر دستخط کیے گئے۔معاہدے کے تحت ڈسکور پاکستان ریلی کا آفیشل میڈیا پارٹنر، جبکہ پاک وہیلز آفیشل ڈیجیٹل میڈیا پارٹنر ہوگا۔