ساؤتھ ایئرلائن کی گوادر، تربت اور پنجگور کو بڑے شہروں سے ملانے کی تیاری

پاکستان کے ہوا بازی کے شعبے میں مزید توسیع ہونے جا رہی ہے کیونکہ نئی نجی ایئرلائن “ساؤتھ ایئر” نے جلد کمرشل پروازیں شروع کرنے کی تیاری کر لی ہے، جس کا مقصد ملک کے کم سہولت والے علاقوں میں فضائی رابطوں کو بہتر بنانا ہے۔
اطلاعات کے مطابق ایئرلائن ابتدائی مرحلے میں گوادر، تربت اور پنجگور کو کراچی، کوئٹہ اور اسلام آباد سے ملانے والی پروازیں چلائے گی، جبکہ باقاعدہ آپریشن جون کے پہلے ہفتے میں شروع کیے جانے کا امکان ہے۔ساؤتھ ایئر نے خود کو نئی نسل کی مقامی ایئرلائن قرار دیتے ہوئے کہا ہے کہ کمپنی سستی اور آسان علاقائی فضائی سفری سہولیات فراہم کرنے پر توجہ دے رہی ہے۔
ایئرلائن کے مطابق اس منصوبے کا مقصد چھوٹے شہروں کو پاکستان کے بڑے معاشی مراکز سے جوڑنا اور محدود فضائی سہولیات رکھنے والے علاقوں کیلئے بہتر سفری مواقع فراہم کرنا ہے۔
رپورٹس کے مطابق ساؤتھ ایئر جون میں ATR 72 طیاروں کے ذریعے فلائٹ آپریشن کا آغاز کرے گی، جبکہ ایئرلائن کا ایک طیارہ اٹلی سے پاکستان آتے ہوئے حال ہی میں مصر پہنچا ہے۔