پاکستان میں سوشل میڈیا خصوصاً واٹس ایپ اکاؤنٹس ہیک ہونے کی شکایات میں اضافہ دیکھنے میں آ رہا ہے، جس کے باعث عام شہریوں میں تشویش پائی جاتی ہے۔
ماہرین کے مطابق ہیکنگ کا ایک عام طریقہ یہ ہے کہ صارفین کو کسی جاننے والے کے نام سے پیغام موصول ہوتا ہے جس میں 6 ہندسوں کا تصدیقی کوڈ مانگا جاتا ہے۔ اکثر صورتوں میں یہ پیغام پہلے سے ہیک ہونے والے اکاؤنٹس سے بھیجا جاتا ہے۔
متعدد صارفین لاعلمی میں یہ کوڈ شیئر کر دیتے ہیں، جس کے بعد ہیکرز ان کے واٹس ایپ اکاؤنٹس کا مکمل کنٹرول حاصل کر لیتے ہیں۔
ماہرین نے واضح کیا ہے کہ واٹس ایپ یا کسی بھی ادارے کی جانب سے تصدیقی کوڈ کبھی بھی شیئر نہیں کیا جاتا، اور صارفین کو اس حوالے سے انتہائی احتیاط کرنی چاہیے۔
اگر کسی کا اکاؤنٹ ہیک ہو جائے تو فوری طور پر واٹس ایپ کو دوبارہ انسٹال کر کے اپنے نمبر سے لاگ اِن کیا جا سکتا ہے۔ اس دوران سسٹم کی جانب سے موصول ہونے والا 6 ہندسوں کا کوڈ درج کرنے سے اکاؤنٹ بحال ہو جاتا ہے۔
ماہرین شہریوں کو مشورہ دیتے ہیں کہ مشکوک پیغامات پر ہرگز یقین نہ کریں اور اپنے اکاؤنٹس کی سکیورٹی کو مضبوط بنانے کے لیے ضروری حفاظتی اقدامات اختیار کریں۔
