لاجواب اور کامیاب اداکار منصور بلوچ کو مداحوں سے بچھڑے30 برس بیت گئے

پاکستان ٹوڈے: پی ٹی وی کے سنہری دور میں جن فنکاروں نے اپنی لاجواب اداکاری اور منفرد لب و لہجے کے باعث پہچان بنائی، ان میں منصور بلوچ کا نام بھی شامل ہے۔

تفصیلات کے مطابق پاکستان ٹیلی ویژن کے کئی معروف ڈراموں اور فلموں میں اداکاری کے جوہر دکھانے والے اداکار منصور بلوچ 3 مئی 1994 کو لاہور میں وفات پا گئے۔ منصور بلوچ 1942 میں پیدا ہوئے، ان کا تعلق نواب شاہ سے تھا۔منصور بلوچ نے متعدد سندھی فلموں اور ڈراموں میں کام کیا۔ ان کے فنی سفر کا آغاز سندھی زبان میں بننے والی فلم سے ہوا تھا۔

بعد میںا نہیں پاکستان ٹیلی وژن کے متعدد ڈراموں میں اداکاری کے جوہر دکھانے کا موقع ملا اور انہوں نے اپنی باکمال اور کامیاب اداکاری سے ناظرین کو اپنی طرف متوجہ کر لیا۔منصور بلوچ نے مشہور ڈرامہ سیریلز دیواریں اور جنگل میں اپنا منفرد کردار نبھا کر خوب شہرت حاصل کی۔ ڈراما سریل دیواریں میں ان کی شاندار اداکاری اور بہترین پرفارمنس پر انہیں پی ٹی وی ایوارڈ سے بھی نوازا گیا۔