سکولوں میں گریڈ 8 کے طلبا کیلئے اے آئی پروجیکٹ کی منظوری

سکولوں کے طلبا کیلئے خوشخبری، گریڈ 8 کے طلبا کیلئے اے آئی پر مبنی ٹولز، پائلٹ پروجیکٹ کی منظوری، حکومت نے پاکستان کے کلاس رومز میں مصنوعی ذہانت متعارف کروانے کیلئے ایک پائلٹ پروجیکٹ کی منظوری دے دی ہے، جس کا آغاز گریڈ 8 کے طلبا سے کیا جائے گا۔
اس منصوبے کے تحت اے آئی پر مبنی ٹولز قومی نصاب کی تعلیم دینے کیلئے استعمال کیے جائیں گے، پائلٹ فیز میں یہ ماڈل دو سکولوں میں آزمایا جائے گا، ایک شہری اور ایک دیہی، تاکہ مختلف تعلیمی ماحول میں اس کی کارکردگی کا جائزہ لیا جا سکے۔
حکام کے مطابق اگر تجرباتی مرحلہ کامیاب رہا تو اس پروگرام کو ملک بھر میں تقریباً 100,000 طلبہ تک بڑھایا جا سکتا ہے۔یہ پروجیکٹ وفاقی ڈائریکٹوریٹ آف ایجوکیشن اور ڈیجیٹل لرننگ سلوشنز تیار کرنیوالی ٹیک کمپنی کے درمیان رسمی معاہدے کے تحت شروع کیا جا رہا ہے، پاکستان انسٹیٹیوٹ آف ایجوکیشن اس پائلٹ فیز کی نگرانی کرے گا اور طلبا کی کارکردگی اور کلاس روم میں تکنیکی موافقت کا تفصیلی جائزہ لے گا۔
تعلیمی ماہرین کے مطابق یہ قدم تعلیم کے شعبے میں اہم تبدیلی لا سکتا ہے، کیونکہ اے آئی کی مدد سے سبق زیادہ شخصی اور انٹرایکٹو بنایا جا سکتا ہے، اس ماڈل کے تحت ہر طالبعلم اپنی رفتار سے سیکھ سکے گا، جبکہ کمزور طلبا کو اضافی مدد ملے گی اور تیز سیکھنے والے طلبا جلد آگے بڑھ سکیں گے۔
حکام کے مطابق ابتدائی سطح پر اے آئی متعارف کروانے کا مقصد نوجوانوں میں ڈیجیٹل لٹریسی کو فروغ دینا اور انہیں مستقبل کی ٹیکنالوجی کیلئے تیار کرنا ہے، جو نا صرف تعلیمی ،بلکہ اقتصادی شعبے میں بھی اہم کردار ادا کرے گی۔