قطر ایئرویز نے جنوبی امریکا میں اپنے فضائی نیٹ ورک کو مزید وسعت دیتے ہوئے بوگوٹا اور کراکس کیلئے نئی پروازیں شروع کرنے کا اعلان کر دیا ہے۔
ایئرلائن کے مطابق نئی پروازوں کا آغاز 22 جولائی 2026 سے ہوگا، جبکہ ہفتہ وار دو پروازیں بدھ اور اتوار کے روز چلائی جائیں گی۔
رپورٹس کے مطابق اس اقدام کے بعد قطر ایئرویز وینزویلا کیلئے پروازیں چلانے والی پہلی خلیجی ایئرلائن بن جائے گی، جبکہ مشرقِ وسطیٰ سے بوگوٹا اور کراکس کیلئے براہِ راست فضائی رابطہ قائم کرنے والی پہلی ایئرلائن بھی ہوگی۔
نئی پروازوں کے اضافے سے ایئرلائن کے امریکا میں مقامات کی تعداد 16 ہو جائے گی، جبکہ مسافروں کو حمد انٹرنیشنل ایئرپورٹ کے ذریعے دنیا بھر کیلئے مزید آسان سفری سہولیات میسر آئیں گی۔
ایئرلائن کا کہنا ہے کہ نئے روٹس کا مقصد مشرقِ وسطیٰ اور جنوبی امریکا کے درمیان فضائی رابطوں کو مضبوط بنانا اور عالمی سفر کے مزید بہتر مواقع فراہم کرنا ہے۔
