لاہورمیں نئی اور جدید سفری سہولیات متعارف، پہلی ٹرام کب چلے گی؟

مسافروں کیلئےمیٹرو بس اور اورنج ٹرین کے بعد نئی سفری سہولت متعارف،لاہور میں پہلی ٹرام کب چلے گی؟تفصیلات سامنے آ گئیں۔
شاپ اینڈ رائیڈ ٹرام کے نام سے رواں سال 2025 میں لاہوریوں کو پہلی ٹرام کا تحفہ ملے گا۔
ذرائع پنجاب حکومت کے مطابق پہلی ٹرام چلانے کیلئے ایل ڈی اے نے اس کی فزیبلٹی پر کام شروع کردیا ہے۔ اس سے قبل ٹرام کا جو منصوبہ تیار کیا گیا تھا، اس میں کلمہ چوک سے مین بلیو روڈ، ایم ایم عالم روڈ، حسین چوک، حالی روڈ سمیت 10 مقامات شامل تھے اور ٹرام کا مکمل روٹ 11 کلومیٹر طویل رکھا گیا تھا اور ایک سے ڈیڑھ کلومیٹر بعد سٹاپ بنانے کا فیصلہ ہوا تھا، لیکن اب ٹرام کی نئی فزیبلٹی تیار کی جارہی ہے۔
ذرائع کے مطابق اب ٹھوکر نیاز بیگ سے ہربنس پورہ تک ٹرام چلائی جائے گی اور نہر کے دونوں اطراف روٹس بنائے جائیں گے۔ ٹرام کو قذافی سٹیڈیم کے اندر خصوصی سٹاپ اوور دیا جائےگا۔ ٹھوکر نیاز بیگ سے ہربنس پورہ تک 24 کلومیٹر طویل ٹریک پر یہ ٹرام چلے گی۔ٹرام چلانے کیلئے ابتدائی طور پر 50 سے 60 ارب روپے کا تخمینہ لگایا گیا ہے اور اس کے ڈیزائن کیلئے فن لینڈ اور چائنا کا جدید ماڈل سٹڈی کیا جارہا ہے۔یہ ٹرام ایک سال کی قلیل مدت میں تیار کی جائے گی اور اس پر کام جلد شروع ہو جائےگا۔ ٹرام کے ٹھوکر سے ہربنس پورہ تک 13 سے 14 سٹاپ بنائے جائیں گے۔