مسلم ممالک کا ٹرمپ کے وعدے کا خیرمقدم، دو ریاستی حل اور امن کیلئے حمایت جاری

پاکستان، اردن، متحدہ عرب امارات، انڈونیشیا، ترکیہ، سعودی عرب، قطر اور مصر نے امریکی صدر ڈونلڈ ٹرمپ کے مجوزہ منصوبے کی حمایت کرتےہوئے دو ریاستی حل اور امن کیلئے حمایت جاری رکھنے کا اعلان کیا۔
مشترکہ اعلامیے کے مطابق مسلم ممالک نے صدر ڈونلڈ ٹرمپ کی اس یقین دہانی کا خیر مقدم کیا ہے کہ مغربی کنارے کے اسرائیلی انضمام کی اجازت نہیں دی جائے گی اور فلسطینی عوام کے حقوق اور تحفظ کو یقینی بنایا جائے گا۔
اعلامیے میں یہ بھی واضح کیا گیا کہ مسلم ممالک، امریکہ اور دیگر عالمی شراکت داروں کے ساتھ مثبت اور تعمیری بات چیت کے لیے تیار ہیں تاکہ مجوزہ معاہدے کو حتمی شکل دی جا سکے۔اس جامع امن منصوبے میں غزہ کی تعمیر نو، انسانی امداد کی فراہمی، مغویوں کی بازیابی، اسرائیلی افواج کا مکمل انخلا اور دو ریاستی حل کے تحت ایک خودمختار فلسطینی ریاست کے قیام کا عزم شامل ہے۔
مسلم ممالک کے وزرائے خارجہ نے کہا کہ یہ اقدامات بین الاقوامی قوانین کے عین مطابق ہیں اور خطے میں دیرپا امن، سلامتی اور استحکام کے لیے ناگزیر ہیں۔