موسم گرما میں بجلی کا حصول کتنےگیگا واٹ رہا؟تمام تر تفصیلات سامنےآ گئیں

موسم گرما میں قومی گرڈ سے بجلی کا حصول کتنےگیگا واٹ رہا؟تمام تر تفصیلات سامنےآ گئیں۔
پالیسی ریسرچ انسٹیٹیوٹ فار اکویٹ ایبل ڈویلپمنٹ کی رپورٹ کے مطابق ملک میں موسم گرما کے دوران قومی گرڈ سے بجلی کا حصول 28 سے 30 گیگا واٹ رہا ،جبکہ صارفین نے قومی گرڈ کے مقابلے میں 33 گیگا واٹ شمسی توانائی کی صلاحیت کو استعمال کر کے بجلی استعمال کی۔
رپورٹ کے مطابق پاکستان میں شمسی توانائی کے پینلز 50 گیگا واٹ تک درآمد کیے گئے، جبکہ قومی بجلی گرڈ کی کُل نصب شدہ صلاحیت تقریبا 46 گیگا واٹ ہے۔
رپورٹ میں کہا گیا ہے کہ صوبوں میں پنجاب شمسی توانائی کے استعمال میں سرفہرست رہا ہے، جبکہ سندھ دوسرے، خیبر پختونخوا تیسرے اور بلوچستان چوتھے نمبر پر ہے۔ شمسی توانائی میں رہائشی شعبہ 16.66 گیگا واٹ کے استعمال کے ساتھ سب سے آگے ہے، جبکہ تجارتی شعبہ 3.73 گیگاواٹ، صنعتی شعبہ 7.91 گیگاواٹ اور زرعی شعبے میں 5.04 گیگاواٹ سولر کا استعمال ہے۔
رپورٹ کے مطابق توانائی کی ضروریات کو پورا کرنے کیلئے 77 فیصد صارفین اپنے شمسی نظام پر انحصار کرتے ہیں ،جبکہ نیشنل گرڈ سے بجلی کے حصول کیلئے 23 فیصد صارفین انحصار کر رہے ہیں۔