ٹیکنالوجی انقلاب :گوگل جیمینائی نے چیٹ جی پی ٹی کو پیچھے چھوڑ دیا

سائنس اینڈٹیکنالوجی کے میدان میں سبقت حاصل کرنے کی دوڑ، گوگل جیمینائی نے چیٹ جی پی ٹی کو پیچھے چھوڑ دیا۔
نئے امیج ایڈیٹنگ فیچر نے گوگل کے اے آئی پلیٹ فارم جیمینائی کو امریکا ، برطانیہ سمیت دنیا بھر میں چیٹ جی پی ٹی کے مقابلے میں زیادہ مقبول ایپ بنا دیا۔گزشتہ ماہ اگست کے آخر میں لانچ ہونیوالے جیمینائی 2.5 فلیش امیج ماڈل نینو بنانا کی مقبولیت میں تیزی کے ساتھ اضافہ ہوا ہے۔ صارفین نے صرف دو ہفتوں کے دوران اس ماڈل کو استعمال کرتے ہوئے 50 کروڑ سے زیادہ تصاویر بنائی ہیں۔
اس فیچر کی لانچنگ کے بعد گوگل جیمینائی امریکا میں اوپن اے آئی کی چیٹ جی پی ٹی اور میٹا کی تھریڈز ایپ کو پیچھے چھوڑتے ہوئے ایپل کی ٹاپ فری ایپس چارٹ میں پہلے نمبر پر آ گیا ہے،جبکہ برطانیہ میں جیمینائی چیٹ جی پی ٹی اور شاپنگ ایپ ٹیمو سے آگے نکل گیا ہے۔
گزشتہ ماہ جب گوگل نے جیمینائی کی اپ ڈیٹس کا اعلان کیا تھا، تو اس وقت کمپنی نے امیج جنریشن اور ایڈیٹنگ ماڈل کو ’’سٹیٹ آف دی آرٹ‘‘ قرار دیتے ہوئے کہا تھا کہ یہ پلیٹ فارم ایسے کام بھی کر سکتا ہے ،جو اس کی حریف کمپنی نے ابھی سوچے بھی نہیں۔