پی آئی اے کا برطانیہ کیلئے فضائی آپریشن : ہفتے میں کتنی پروازیں چلیں گی؟

پاکستانی فضائی مسافروں کیلئے خوشخبری، پی آئی اے کا برطانوی فضائی آپریشن کی بحالی کا باضابطہ اعلان، ہفتے میں کتنی پروازیں چلائی جائیں گی؟تمام تر تفصیلات منظر عام پرآ گئیں۔
قومی ایئر لائن پی آئی اے کے برطانیہ کیلئے فلائٹ آپریشن کا آغاز 25 اکتوبر سے ہوگا جبکہ پی آئی اے پہلے مرحلے میں اسلام آبادسے مانچسٹر کیلئے ہفتہ وار 2 پروازیں اپریٹ کرے گی۔پروازیں ہفتے اور منگل کے روز آپریٹ ہوں گی، اسلام آباد سے شیڈول کے مطابق پی آئی اے کی پرواز 12 بجے روانہ ہوگی اور شام 5 بجے مانچسٹر پہنچے گی، مانچسٹر سے پرواز شام 7 بجے روانہ ہوگی اور صبح 7 بجے اسلام آباد پہنچے گی۔
ترجمان قومی ایئر لائن کے مطابق مانچسٹر کی پروازوں میں بتدریج اضافہ کیا جائے گا اور دوسرے مرحلے میں لندن کی پروازیں بھی شروع کی جائیں گی،پروازیں بکنگ کیلئے کھول دی گئی ہیں اور انتہائی موزوں کرایہ متعارف کروایا گیا ہے۔
ترجمان کے مطابق ہمارا نصب العین مسافروں کو انتہائی آرام دہ اور تمام تر سہولیات سے مزین سفری سہولیات کی فراہمی ہے۔