کراچی : آلودگی کیخلاف کہاں اور کن خاص درختوں کا نیا جنگل آباد کیا جارہا ہے؟

کراچی میں آلودگی سے نمٹنے کا منفرد منصوبہ، کہاں اور کن خاص درختوں کا نیا جنگل آباد کیا جارہا ہے؟ تمام تر تفصیلات منظر عام پر آ گئیں۔
ساحلی شہرکراچی میں آلودگی کیخلاف اہم ماحولیاتی مشن جاری، جس کے تحت انڈس ڈیلٹا کے علاقے حجامڑو کریک میں مینگروز کے وسیع جنگلات آباد کیے جا رہے ہیں۔شہر قائد سے تقریباً 200 کلومیٹر دور واقع اس علاقے میں 18 لاکھ ایکڑ سے زائد رقبے پر مینگروز کے درخت لگائے گئے ہیں، جو ناصرف آلودگی کے اثرات کو کم کرنے میں مددگار ہیں، بلکہ یہ عام درختوں اور پودوں کے مقابلے میں پانچ گنا زیادہ کاربن جذب کرنے کی انتہائی زیادہ صلاحیت رکھتے ہیں۔
اس جنگل کی بحالی سے فضا میں موجود نقصاندہ کاربن کی مقدار میں نمایاں کمی آئے گی اور ماحولیاتی توازن قائم کرنے میں مدد ملے گی۔
ماہرین کے مطابق دریائے سندھ کا پانی ڈیلٹا میں جاری رہنا مینگروز کی بقا کیلئے ناگزیر ہے، مینگروز کے یہ درخت سمندر کو آگے بڑھنے سے روکتے ہیں، ساحلی پٹی کو کٹاؤ سے محفوظ رکھتے ہیں اور شدید سمندری طوفانوں کے دوران ساحلی آبادیوں کے تحفظ کیلئے قدرتی ڈھال کا کردار ادا کرتے ہیں۔
سندھ فاریسٹ ڈپارٹمنٹ کے مطابق حجامڑو کریک دنیا کا سب سے بڑا مینگرو ریسٹوریشن پروجیکٹ ہے، جہاں کاربن کریڈیٹ جنریٹ ہوتے ہیں، جو عالمی ماحولیاتی منڈی میں پاکستان کیلئے ایک فائدہ مند مالی ذریعہ ہے۔
ماہرین کے مطابق مینگروز کی موجودگی سے ماحولیاتی فوائد کے ساتھ ساحلی معیشت کو بھی فروغ ملے گا، کیونکہ اسی علاقے میں سوہا مچھلی کی پیداوار بڑی مقدار میں ہوتی ہے، جو پاکستان کیلئے قیمتی زرمبادلہ کا ذریعہ ہے ۔