گرمی میں گاڑی میں رکھی کون سی اشیا خطر ناک ہو سکتی ہیں؟

گرمی میں گاڑی میں رکھی کون سی چیزیں خراب یا خطرناک ثابت ہوسکتی ہیں؟ گرمی کے موسم میں گاڑی کے اندرمختلف اشیا رکھنا کتنا نقصان دہ ہوسکتا ہے؟ماہرین نے گرمی کے دنوں میں سفر کرنیوالے شہریوں اور سیاحوں کو خبردار کردیا۔
طبی ماہرین نے شہریوں کو احتیاطی تدابیر اپنانے کا مشورہ دیتے ہوئے چند گائیڈ لائنز دی ہیں، جن کے مطابق پانی کی بوتلیں یا پلاسٹک کے برتن گاڑی میں ہر گزنہ رکھیں، کیونکہ شدید گرمی کے باعث یہ گرم ہوکر پگھل سکتے ہیں اور پھٹ سکتے ہیں۔شدیدگرمی میڈیسن کو بھی متاثر کر تی ہے، جس سے وہ خراب ہو سکتی ہیں۔اس کے علاوہ گاڑی کے اندر رکھی الیکٹرونکس اشیا بیٹریاں، ایل ای ڈیز ، موبائل فون، لیپ ٹاپ اور ٹیبلٹ کو بھی نقصان پہنچا سکتا ہے۔گرمی کے باعث کھانے پینے کی اشیادودھ، گوشت اور انڈے وغیری بھی بہت جلد خراب ہو سکتے ہیں۔
ماہرین نے تنبیہ کی ہے کہ جھلسا دینے والی گرمی میں آتش گیر مواد گاڑی میں ہر گز نہ رکھا جائے،کیونکہ اس سے آگ لگنے کا خطرہ ہوتا ہے۔اس کے علاوہ خواتین کےمیک اپ کا سامان اور بچوں کی نگہداشت کی مصنوعات اورموسیقی کے آلات بھی گرمی کے باعث خراب ہو سکتے ہیں، جبکہ پالتو جانوروں، بچوں یا بوڑھوں کو کبھی بھی گرمی کے دوران کار میں نہ چھوڑیں، کیونکہ گرمی کی وجہ سے اے سی بند ہونے یا خراب ہونے کی صورت میں ان کی جان کو خطرہ لاحق ہو سکتا ہے۔