یوم تکبیر کی چھٹی: 28 مئی کو ہونیوالے انٹرمیڈیٹ کے امتحانات ملتوی

طلبا و طالبات کیلئے اہم خبر،یوم تکبیر پر عام تعطیل کا اعلان، 28 مئی کو ہونیوالے انٹرمیڈیٹ کے امتحانات ملتوی کردئیےگئے۔
اعلیٰ ثانوی تعلیمی بورڈ کراچی نے چیئرمین غلام حسین سوہو کی ہدایت پر اعلان کیا ہے کہ حکومت ِسندھ کی جانب سے یوم تکبیر28 مئی کو عام تعطیل کے اعلان کے پیش نظر اس روز ہونیوالے انٹرمیڈیٹ کے امتحانات ملتوی کر دیے گئے ہیں۔
ترجمان کراچی بورڈ کے مطابق ملتوی شدہ پرچے اب 30 مئی 2025 بروز جمعہ کو لیے جائیں گے۔ سائنس پری میڈیکل اور سائنس جنرل گروپس کے متاثرہ پرچے نئی تاریخ پر انہی اوقات میں منعقد ہوں گے۔
ترجمان بورڈ کے مطابق باٹنی پرچہ اول جو 28 مئی کو صبح 9 بجے سے 11 بجے تک ہونا تھا، اب 30 مئی کو انہی اوقات میں لیا جائے گا۔اسی طرح انگلش نارمل کا پرچہ اول اور انگلش ایڈوانسڈ پرچہ اول (فیل طلبا کیلئے) جو 28 مئی کو دوپہر 2 بجے سے شام 5 بجے تک ہونا تھا، اب 30 مئی کو سہ پہر 3 بجے سے شام 6 بجے تک لیا جائے گا۔
ترجمان نے واضح کیا ہے کہ امتحانی مراکز میں کوئی تبدیلی نہیں کی گئی اور تمام امیدواروں کو پرانے داخلہ کارڈ کے ساتھ ہی متعلقہ مراکز پر پہنچنے کی ہدایت کی گئی ہے۔