ملک میں عید الفطر مذہبی عقیدت و احترام کیساتھ منائی جا رہی ہے

ملک بھر میں آج عید الفطر مذہبی عقیدت و احترام کے ساتھ منائی جارہی ہے۔
چھوٹے بڑے شہروں میں نمازِ عید کے ہزاروں اجتماعات منعقد ہوئے، جہاں امتِ مسلمہ کے اتحاد اور ملک کی سلامتی، ترقی اور خوشحالی کے لیے خصوصی دعائیں کی گئیں۔نماز کی ادائیگی کے بعد شہریوں نے ایک دوسرے سے گلے مل کر عید کی خوشیاں بانٹیں اور مبارکباد دی۔
وفاقی دارالحکومت اسلام آباد میں مرکزی اجتماع فیصل مسجد میں ہوا، جہاں ہزاروں افراد نے نماز ادا کی۔ لاہور کی بادشاہی مسجد اور کراچی کی مختلف مساجد میں بھی بڑے پیمانے پر اجتماعات دیکھنے میں آئے۔
صدر مملکت آصف علی زرداری نے نوابشاہ میں زرداری ہاؤس پر نمازِ عید ادا کی اور ملکی استحکام کے لیے دعا کی۔ چیئرمین پیپلز پارٹی بلاول بھٹو زرداری نے لاڑکانہ میں نماز ادا کرنے کے بعد شہریوں سے ملاقات کی اور عید کی مبارکباد دی۔
گورنر سندھ نہال ہاشمی نے گورنر ہاؤس میں نماز ادا کی، جبکہ سابق وزیر داخلہ شیخ رشید نے راولپنڈی میں عید کی نماز پڑھی۔ جمعیت علمائے اسلام کے سربراہ مولانا فضل الرحمان نے ڈی آئی خان کے علاقے عید الخیل میں نمازِ عید کی امامت کی۔