تہران: ایران کے اعلیٰ مذاکرات کار اور پارلیمنٹ اسپیکر محمد باقر قالیباف نے کہا ہے کہ تہران امریکا کے ساتھ کسی بھی معاہدے کو اس وقت تک قبول نہیں کرے گا جب تک اس کے واضح، ٹھوس اور قابلِ تصدیق نتائج سامنے نہ آئیں۔
ایرانی سرکاری میڈیا کے مطابق محمد باقر قالیباف نے پارلیمنٹ کے ایک ورچوئل اجلاس سے خطاب کرتے ہوئے کہا کہ ایران مخالف فریق کے بیانات اور وعدوں پر اعتماد نہیں کرتا، اسی لیے کسی بھی پیش رفت کو صرف عملی نتائج کی بنیاد پر پرکھا جائے گا۔
انہوں نے کہا کہ ایرانی عوام کے حقوق کا تحفظ ہر ممکن معاہدے میں بنیادی شرط ہے، اور جب تک ان حقوق کی مکمل ضمانت فراہم نہیں کی جاتی، ایران بھی اپنی ذمہ داریاں ادا نہیں کرے گا۔
قالیباف کا کہنا تھا کہ تہران صرف اسی صورت میں کسی معاہدے کا حصہ بنے گا جب اس کے عملی فوائد اور نتائج واضح طور پر سامنے آئیں۔
انہوں نے مزید کہا کہ پارلیمنٹ آئندہ دور میں معیشت، عوامی فلاح، امید افزائی اور مستقبل کی منصوبہ بندی پر خصوصی توجہ مرکوز رکھے گی۔
ایرانی پارلیمنٹ اسپیکر نے اس بات کا اعادہ بھی کیا کہ ایران بیرونی دباؤ اور جارحانہ پالیسیوں کے مقابلے میں اپنے مؤقف اور قومی مفادات کے تحفظ کو ترجیح دیتا رہے گا۔
