سٹی ٹریفک پولیس لاہور نے شہریوں کو بہتر سفری سہولیات اور بروقت ٹریفک معلومات فراہم کرنے کے لیے “راستہ” موبائل ایپ کے استعمال کی ترغیب دی ہے۔
ٹریفک پولیس کے مطابق یہ ایپ شہریوں کو ٹریفک کی تازہ صورتحال، متبادل راستوں، سفری رہنمائی اور ہنگامی حالات سے متعلق فوری معلومات فراہم کرتی ہے، جس سے سفر کو زیادہ محفوظ اور آسان بنایا جا سکتا ہے۔
حکام کا کہنا ہے کہ “راستہ ایپ” کے ذریعے شہری ٹریفک جام سے بچنے، وقت اور ایندھن کی بچت کرنے اور بہتر سفری منصوبہ بندی میں مدد حاصل کر سکتے ہیں۔
ایپ میں ٹریول ایڈوائزری، ٹریفک اپڈیٹس، نیوز اینڈ ایونٹس، فیڈ بیک، ایمرجنسی کالز، ڈرائیونگ لائسنس سے متعلق سہولیات اور ای ٹکٹ سمیت متعدد فیچرز شامل کیے گئے ہیں۔
ٹریفک پولیس لاہور کے مطابق غلط راستوں کے انتخاب سے شہریوں کا وقت، ایندھن اور ذہنی سکون متاثر ہوتا ہے، جبکہ یہ ایپ بہتر ٹریفک مینجمنٹ اور سہل سفر کے تصور کو فروغ دینے میں معاون ثابت ہو سکتی ہے۔
شہریوں کو ہدایت کی گئی ہے کہ وہ ایپ کو متعلقہ موبائل ایپ اسٹورز سے ڈاؤن لوڈ کریں، جبکہ ایمرجنسی صورتحال میں مدد کے لیے ہیلپ لائن 15 سے بھی رابطہ کیا جا سکتا ہے۔
