پاکستان ٹیلی کمیونیکیشن اتھارٹی (پی ٹی اے) نے شہریوں کو سائبر فراڈ اور آن لائن خطرات سے محفوظ رکھنے کے لیے ڈیجیٹل سیکیورٹی سے متعلق نئی ایڈوائزری جاری کر دی ہے۔
پی ٹی اے کی جانب سے جاری ہدایات میں کہا گیا ہے کہ صارفین اپنے آن لائن اکاؤنٹس کے تحفظ کے لیے مضبوط، منفرد اور پیچیدہ پاس ورڈز استعمال کریں اور کمزور یا آسان پاس ورڈز سے گریز کریں۔
ایڈوائزری میں مزید کہا گیا ہے کہ ایک ہی پاس ورڈ کو مختلف اکاؤنٹس کے لیے استعمال نہ کیا جائے اور ہر اکاؤنٹ کے لیے الگ پاس ورڈ رکھا جائے تاکہ سیکیورٹی خطرات کو کم کیا جا سکے۔
اتھارٹی نے شہریوں کو ہدایت کی ہے کہ وہ اپنے اکاؤنٹس میں دو مرحلہ جاتی توثیق (Two-Factor Authentication) لازمی طور پر فعال کریں، جبکہ نام، تاریخ پیدائش یا آسان نمبرز جیسے 1234 کو پاس ورڈ کے طور پر استعمال کرنے سے مکمل اجتناب کریں۔
پی ٹی اے کے مطابق صارفین کو چاہیے کہ وہ اپنے پاس ورڈز کسی کے ساتھ شیئر نہ کریں اور انہیں وقتاً فوقتاً تبدیل کرتے رہیں تاکہ ڈیجیٹل سیکیورٹی کو بہتر بنایا جا سکے۔
اعلامیے میں یہ بھی کہا گیا ہے کہ فنگر پرنٹ اور چہرے کی شناخت جیسے بائیومیٹرک فیچرز کو ترجیح دی جائے، کیونکہ مضبوط سیکیورٹی اقدامات ہی محفوظ ڈیجیٹل مستقبل کی ضمانت ہیں۔ صارفین کو پی ٹی اے کی ہدایات پر عمل کرنے کی تاکید بھی کی گئی ہے۔
