مینارپاکستان پرجلسہ کی اجازت کامعاملہ:پی ٹی آئی کاعدالت سےرجوع

مینار پاکستان پرجلسےکی اجازت کےلئےتحریک انصاف نےعدالت سےرجوع کرلیا۔
تحریک انصاف پنجاب کی چیف آرگنائزر عالیہ حمزہ کی درخواست پرلاہور ہائیکورٹ کےجسٹس فاروق حیدر نے سماعت کی۔
درخواست میں موقف اختیارکیاگیاکہ 29 جنوری کوڈی سی لاہورکو درخواست دی تھی کہ 8 فروری کو مینار پاکستان گراؤنڈ میں جلسے کی اجازت دی جائے۔مگر تاحال ڈی سی آفس میں کوئی بھی شنوائی نہیں ہوئی۔
درخواست میں کہا گیا کہ پی ٹی آئی جب بھی جلسے کی اجازت مانگتی ہے تو امن و امان کا مسئلہ بنا لیا جاتا ہے، عالیہ حمزہ کو ہراساں کیا جا رہا ہے، درخواست واپس لینے کے لیے دھمکیاں دی جا رہی ہیں۔
درخواست میں استدعاکی گئی کہ ڈپٹی کمشنر لاہور سمیت دیگر کو ہدایت کی جائے کہ 8 فروری کو مینار پاکستان گراؤنڈ میں جلسے کی اجازت دیں، پی ٹی آئی کے بے گناہ کارکنان کو ہراساں کرنے اور اغوا کرنے سے روکا جائے۔