سکولوں کے اوقاتِ کار محدود، گرمیوں کی چھٹیاں جلدی کرنے کی تجویز

طلبا و طالبات کیلئے خوشخبری،سکولوں کے اوقاتِ کار محدود اور موسم گرما کی تعطیلات جلدی دینے کی تجویز سامنے آ گئی۔
ہیٹ ویو سے بچاؤ کیلئے پرویشنل ڈیزاسٹر مینجمنٹ اتھارٹی (پی ڈی ایم اے) پنجاب نے سکولوں کے اوقات ِکار میں تبدیلی اور زیادہ گرمی کی صورت میں جلد موسم گرما کی تعطیلات کا اعلان کرنے کیلئے محکمہ تعلیم کو مراسلہ جاری کردیا۔
مراسلے میں محکمہ تعلیم کو سکولز اور کالجز میں ہیٹ ویو بچاؤ کیلئے مختلف ہدایات پر عمل کی سفارش کی گئی ہے۔صوبے بھر کے کمشنر و ڈپٹی کمشنرز کو جاری مراسلے میں کہا گیا ہے کہ ہیٹ ویو سے بچاؤ کیلئے سکولوں کے اوقات ِکار میں ردوبدل کیا جائے اور زیادہ گرمی کی صورت میں موسم گرما کی تعطیلات جلد کی جائیں، سکول اور کالجز میں بلا تعطل ٹھنڈے اور صاف پانی کی دستیابی کو یقینی بنائیں اور بچوں کو ہلکے، ڈھیلے ڈھالے کپڑے استعمال کروانے کیلئے واضح ہدایات کی جائیں۔
مراسلے میں عارضی طور پر آوٹ ڈور سرگرمیوں پر فی الفور پابندی عائد کرنے، کلاس رومز کی وینٹیلیشن، پنکھے اور کولنگ سسٹم کو فنکشنل رکھنے اور سکولوں میں ابتدائی طبی امداد کاؤنٹرز قائم کرنے کی ہدایت بھی کی گئی ہے۔
مراسلے میں کہا گیا ہے کہ ہیٹ ویو سے بچاؤ کیلئے ابتدائی طبی امداد کاؤنٹرز پر ٹرینڈ سٹاف کو ڈیوٹی پر مامور کیا جائے۔