پہلے جدید اولمپک مقابلوں کا تمغہ نیلامی میں حیران کن قیمت پر فروخت

نئی تاریخ رقم،پہلے جدید اولمپک مقابلوں کا تمغہ نیلامی میں حیران کن قیمت پر فروخت،پہلے جدید اولمپک کھیلوں میں دیا گیا، ایک چاندی کا تمغہ نیلامی میں متوقع قیمت سے تقریباً 4 گنا زیادہ قیمت پر فروخت ہو گیا۔
1896 کے ایتھنز اولمپکس کا یہ تاریخی تمغہ برون راسموسن آرٹس آکشنئرز کی آن لائن نیلامی میں 141,659 امریکی ڈالر میں فروخت ہوا، جبکہ خریدار کی فیس شامل کرنے کے بعد قیمت 181,323 ڈالر تک پہنچی۔اس سے قبل اس تمغے کی قیمت 31,480 سے 47,220 ڈالر کے درمیان تخمینہ لگائی گئی تھی۔
فرانسیسی فنکار جولز کلیمنٹ چاپلین نے اس تمغے پر زيوس کو گلوب پکڑے ہوئے اور فتح کی دیوی نائیک کے ساتھ زیتون کی شاخ تھامے ہوئے دکھایا ہے۔1896 کے کھیلوں میں 14 ممالک کے 241 کھلاڑی حصہ لے رہے تھے، جن میں ڈنمارک بھی شامل تھا۔
نیلام گھر کے مطابق ویگو ینگسن ڈنمارک کے پہلے اولمپک ویٹ لفٹنگ چیمپئن بنے، مگر یہ تصدیق نہیں کی جا سکی کہ یہ خاص تمغہ اسی کامیابی کیلئے دیا گیا تھا یا نہیں۔اس تمغے کے پچھلے حصے پر ایتھنز کا ایکروپولس اور پارٹھیون کی تصویر کے ساتھ یونانی عبارت ’’بین الاقوامی اولمپک کھیل، ایتھنز 1896‘‘ کندہ ہے۔