اسرائیل ایران کیساتھ امریکاکا معاہدہ نہیں چاہتا، امریکی نائب صدر جے ڈی وینس کا بڑا دعویٰ

امریکی نائب صدر جے ڈی وینس نے کہا ہے کہ اسرائیل ایران کے ساتھ کسی بھی ممکنہ معاہدے کا خواہاں نہیں، جبکہ ان کے بقول مخالفین کے پاس مسئلے کا کوئی حقیقت پسندانہ حل موجود نہیں اور وہ صرف مسلسل بمباری کو ہی واحد راستہ قرار دیتے ہیں، جو مؤثر ثابت نہیں ہوئی۔

ایک انٹرویو میں گفتگو کرتے ہوئے جے ڈی وینس نے واضح کیا کہ امریکا ایران میں حکومت کی تبدیلی کے لیے اپنی زمینی فوج نہیں بھیجے گا۔ ان کا کہنا تھا کہ اگر ایرانی عوام اپنے سیاسی نظام میں تبدیلی چاہتے ہیں تو یہ فیصلہ صرف انہی کا حق ہے۔

انہوں نے دعویٰ کیا کہ اسرائیلی حکومت سے وابستہ بعض عناصر نے ایران کے ساتھ ممکنہ معاہدے کو ناکام بنانے کے لیے امریکا میں ایک غیر ملکی اثر و رسوخ کی مہم پر بھاری سرمایہ خرچ کیا۔ تاہم انہوں نے زور دیا کہ وہ ہر صورت امریکی مفادات کو مقدم رکھیں گے اور کسی بیرونی دباؤ کو اپنی پالیسی پر اثر انداز نہیں ہونے دیں گے۔

امریکی نائب صدر کے مطابق ایران کی جوہری تنصیبات کو نشانہ بنانا ایک محدود اور قلیل مدتی ہدف تھا، جبکہ امریکا کی بنیادی ترجیح آبنائے ہرمز کو کھلا رکھنا اور عالمی منڈیوں تک تیل و گیس کی مسلسل اور بلا تعطل فراہمی کو یقینی بنانا ہے۔