وزیراعلیٰ پنجاب مریم نواز شریف نے عید الاضحیٰ کے موقع پر انتظامی افسران کو فیلڈ میں متحرک رہنے اور تمام تر انتظامات خود مانیٹر کرنے کی سخت ہدایت جاری کی ہے۔
ان کی زیر صدارت اعلیٰ سطح اجلاس میں عید کے انتظامات، سکیورٹی اور صفائی کے امور پر تفصیلی بریفنگ لی گئی اور واضح ہدایات جاری کی گئیں۔
اجلاس میں تمام ڈپٹی کمشنرز اور ڈی پی اوز کو خصوصی ٹاسک سونپے گئے، جبکہ وزیراعلیٰ نے ہدایت کی کہ عید کے دوران ہر صورت بہترین انتظامات یقینی بنائے جائیں اور کسی قسم کی کوتاہی برداشت نہیں کی جائے گی۔
انہوں نے کہا کہ جانوروں کی آلائشیں گلی محلوں، نالوں اور نہروں میں پھینکنے پر 50 ہزار روپے جرمانہ عائد کیا جائے گا، جبکہ مویشیوں کی خرید و فروخت صرف مقررہ کیٹل مارکیٹوں تک محدود ہوگی۔
غیر قانونی منڈیوں کے خلاف کارروائی، ڈیجیٹل مانیٹرنگ، سکیورٹی کے سخت انتظامات اور جرائم پیشہ عناصر کے خلاف کومبنگ آپریشنز جاری رکھنے کی بھی ہدایت دی گئی۔
وزیراعلیٰ نے مزید کہا کہ اسلحہ کی نمائش، ہوائی فائرنگ، اور لاؤڈ اسپیکر کے غیر ضروری استعمال پر مکمل پابندی ہوگی، جبکہ عبادت گاہوں اور اجتماعات میں سکیورٹی کے خصوصی انتظامات کیے جائیں گے۔
انہوں نے صفائی کے انتظامات کو مثالی بنانے اور بہترین کارکردگی دکھانے والے اضلاع کی حوصلہ افزائی کا بھی اعلان کیا۔
مریم نواز شریف نے خبردار کیا کہ عید ایس او پیز کی خلاف ورزی پر سخت کارروائی کی جائے گی اور تمام افسران اپنی ذمہ داریاں خود ادا کریں۔
