خیبرپختونخوا کے وزیراعلیٰ سہیل آفریدی نے جمعیت علمائے اسلام کے سربراہ مولانا فضل الرحمان سے ان کی رہائش گاہ پر ملاقات کی، جس میں صوبے میں امن و امان کی صورتحال پر تفصیلی گفتگو کی گئی۔
جمعیت علمائے اسلام کے ترجمان کے مطابق وزیراعلیٰ سہیل آفریدی وفد کے ہمراہ مولانا فضل الرحمان کی رہائش گاہ پہنچے اور اس موقع پر انہوں نے شیخ ادریس کی شہادت پر تعزیت کا اظہار کیا۔
وزیراعلیٰ نے شیخ ادریس کے درجات کی بلندی کے لیے دعا بھی کی اور فاتحہ خوانی کی، جبکہ ملاقات کے دوران خیبرپختونخوا میں امن و امان کی مجموعی صورتحال پر تشویش کا اظہار کیا گیا۔
ترجمان کے مطابق ملاقات میں صوبائی حقوق کے حوالے سے بھی تفصیلی تبادلہ خیال ہوا۔
بعد ازاں مولانا فضل الرحمان نے وزیراعلیٰ خیبرپختونخوا کے اعزاز میں عشائیہ دیا، جس میں صوبائی وزیر اطلاعات شفیع جان، جبکہ جمعیت علمائے اسلام کی جانب سے انجینئر ضیاء الرحمن اور مولانا اسجد محمود بھی شریک ہوئے۔
