لاہور تا راولپنڈی ریل کار کے نئے ریک کاباضابطہ افتتاح ہو گیا

ریل کے مسافروں کیلئے خوشخبری ،لاہور تا راولپنڈی ریل کار کے نئے ریک کاباضابطہ افتتاح ہو گیا۔
پاکستان ریلویز نے لاہور سے راولپنڈی کے درمیان چلنے والی ریل کار کے نئے ریک کا باضابطہ افتتاح کردیا۔افتتاحی تقریب میں چیف ایگزیکٹو آفیسر ریلوے عامر علی بلوچ نے شرکت کی اور نئی بوگیوں کا معائنہ کیا۔
ریلوے حکام کے مطابق ریل کار کے نئے ریک کو دشوار گزار راستوں پر موجود ٹریک سے گزارنے کیلئے بوگیوں کو ری فربش کیا گیا ہے۔بوگیوں میں مسافروں کی سہولت کیلئے کھانے پینے کی اشیا، ابتدائی طبی امداد کیلئے ادویات اور صفائی ستھرائی کا خاص انتظام کیا گیا ہے۔
افتتاح کے موقع پر سی ای او ریلوے عامر علی بلوچ کا کہنا تھا کہ مزید ٹرینوں میں بھی سہولیات فراہم کی جارہی ہیں، کھانے پینے کی اشیاسے لیکر صفائی اور طبی امداد تک بہترین انتظامات کیے گئے ہیں۔
انہوں نے کہا کہ ریل کا سفر آج بھی دیگر ٹرانسپورٹ ذرائع کے مقابلے میں سستا اور محفوظ ہے، ہمارا اصل مقصد مسافروں کو جلد اور بحفاظت اُن کی منزل تک پہنچانا ہے۔
ان کامزید کہنا تھا کہ لوکو موٹو اور ٹریکس کی مرمت کا کام جاری ہے ،جبکہ انٹرنیشنل فنانسنگ کے ذریعے ٹریک کی اپ گریڈیشن بھی کی جا رہی ہے، تاکہ مستقبل میں ٹرینوں کی رفتار اور سروس کے معیار میں مزید بہتری لائی جا سکے۔