یوٹیوب میں ویڈیوز شیئر کرنے کیلئے نیا میسجنگ فیچر متعارف

یو ٹیوبرز کیلئے خوشخبری، یوٹیوب نے اپنی موبائل ایپ میں پرائیویٹ میسجنگ فیچر کی آزمائش شروع کر دی ہے، جس کے تحت محدود صارفین کو ایپ کے اندر ہی ویڈیوز، شارٹس اور لائیو سٹریمز براہِ راست شیئر کرنے کی سہولت دی گئی ہے۔
یوٹیوب کے مطابق شیئر بٹن دبانے پر ایک فل سکرین میسجنگ ونڈو کھلتی ہے، جہاں صارفین پرائیویٹ گفتگو یا گروپ چیٹ کا آغاز کر سکتے ہیں۔ فیچر میں صارفین ٹیکسٹ، ایموجیز اور ویڈیو کے ذریعے جواب دینے کی سہولت بھی حاصل کریں گے، یہ تجرباتی میسجنگ فیچر فی الحال آئرلینڈ اور پولینڈ میں 18 سال یا اس سے زائد عمر کے صارفین کے لیے دستیاب ہے۔
یوٹیوب کے مطابق ان ایپ میسجنگ صارفین کی نمایاں ترین درخواستوں میں شامل رہی ہے، کیونکہ اس وقت ویڈیوز شیئر کرنے کے لیے واٹس ایپ، ای میل، میسجز اور سوشل میڈیا پلیٹ فارمز کا سہارا لینا پڑتا ہے۔چیٹ شروع کرنے سے پہلے انوائٹ بھیجنا لازمی ہوگا، جبکہ صارفین پیغامات واپس لینے، بلاک کرنے اور چیٹس رپورٹ کرنے کے اختیارات بھی رکھیں گے۔
یوٹیوب کے مطابق پلیٹ فارم میسجز کی نگرانی بھی کرے گا تاکہ کمیونٹی گائیڈ لائنز کی خلاف ورزی کو روکا جا سکے۔
واضح رہے کہ یوٹیوب نے 2019 میں یہی فیچر ختم کر دیا تھا، تاہم اس وقت کی وجوہات پوری طرح سامنے نہیں آ سکیں، اس بار کمپنی نے سکیورٹی اور پرائیویسی اقدامات مزید سخت کر دیے ہیں۔