ڈیٹا سینٹرز جدید ڈیجیٹل دنیا کی ریڑھ کی ہڈی ہیں جو کلاؤڈ اسٹوریج اور مصنوعی ذہانت سمیت متعدد خدمات کو چلانے میں اہم کردار ادا کرتے ہیں، تاہم ان میں موجود ہزاروں سرورز کو ٹھنڈا رکھنا بڑی مقدار میں توانائی خرچ کرتا ہے۔
امریکا کی یونیورسٹی آف الینوائے اربانا-شیمپین کے انجینئرز نے اس مسئلے کے حل کے لیے جدید 3D پرنٹڈ خالص تانبے (کاپر) سے بنے کولنگ پلیٹس تیار کیے ہیں جو حرارت کو زیادہ مؤثر طریقے سے خارج کرنے کی صلاحیت رکھتے ہیں۔
تحقیقی نتائج کے مطابق یہ نیا ڈیزائن ڈیٹا سینٹرز میں کولنگ کے لیے استعمال ہونے والی توانائی میں 98 فیصد تک کمی لا سکتا ہے، جبکہ ہیٹ مینجمنٹ کی کارکردگی میں بھی نمایاں بہتری ممکن ہے۔
ماہرین کے مطابق اگر یہ ٹیکنالوجی بڑے پیمانے پر کامیابی سے استعمال کی گئی تو اس سے نہ صرف بجلی کی کھپت میں کمی آئے گی بلکہ آپریشنل اخراجات بھی کم ہوں گے اور ڈیٹا سینٹرز زیادہ توانائی مؤثر بن سکیں گے۔
ماہرین کا کہنا ہے کہ ایسی جدید ایجادات یہ ظاہر کرتی ہیں کہ ایڈوانسڈ مینوفیکچرنگ اور انجینئرنگ کے ذریعے ڈیجیٹل انفراسٹرکچر کے توانائی کے اثرات کو نمایاں طور پر کم کیا جا سکتا ہے۔
